Shillong, June 25: U Chief Electoral Officer (CEO) ka Meghalaya u Bah FR Kharkongor ha ka sngi Thohdieng u la ong ba ka jingpynkhreh na ka bynta ka elekshon jied President ba thymmai ha ka Ri ka la iaid shakhmat kumba la buh ba kan long ha ka 18tarik u Naitung.
“Ngi la pynkhreh pura na ka bynta kane ryngkat bad ka ophis Meghalaya Legislative Assembly ban pynlong ia kane ka jingthep vote bad ngi la dep ruh ban pynlong shi kylla ia ka jinghikai na bynta ki heh pyniaid elekshon jong ka Iing Dorbar Thawain ka jylla,” ong u CEO.
U la iathuh ruh ba ka kylla kaba bud na ka bynta ka jinghikai ia ki heh sorkar jong ka Assembly kan sa long shen ha kaba kin batai lut kumno ban pynlong ia katei ka elekshon namar mynta ka kynti ia ka elekshon kin pynlong da ka rukom ki ballot box ym dei da ka EVM.
La iathuh ruh ba ka rukom thep vote ka long kaba kham pher namar ki hap ban pynpaw iano ki kyrshan.
U CEO u la pyntip ruh ba donkam sa shisien ban hikai ia ki nongpyniaid elekshon bad dei na kane ka daw ba ki heh sorkar na ka tnad kumjuh ruh na ka Assembly kin hap ban leit sha Delhi ban leit shim ia ki ballot box.
Katkum ka jingong jong u tang shu poi ki ballot box, yn hap ban buh ia ki ha ka jaka ba kyrpang ryngkat ka jingpahara kaba jur.
Ha kajuh ka por u CEO u la pyntip ruh ba u MP ka Rajya Sabha ba marwei na ka jylla, u Dr. WR Kharlukhi u la pynpaw lang ba u kwah ban shim bynta ia katei ka elekshon na Shillong.
“U (Dr. WR Kharlukhi) u la dep ban phah ia ka jingpyntip sha ka ECI ha ka rukom kaba dei bad nga ngeit ruh ba ka ECI kan sa pyntip bad mynjur halor katei ka phang,” bynrap biang u CEO.
