Shillong Jylliew 25: Ki Nongthaw Ain ka Jylla kiba dei na ki seng sain pyrthei bapher bapher, kila iaroh ia ka sorkar NDA ba ialam da ka BJP kaba la jied ia ka Longkmie na ki jaidbynriew Riewlum ban aireng ha ka elekshon President ka Ri, ka ban long ha ka 18 tarik naitung.
U President ka United Democratic Party (UDP) bad Lamphang ka Iingdorbar Thaw ain bah Metbah Lyngdoh ula pynbna ba ka UDP ka la rai ban kyrshan ia ka kyrtong jong ka NDA ka Droupadi Murmu.
“Ka dei shisha ka jingurlong ka jingphohsniew ban iohi ia ka jaidbynriew Riewlum ba kan shong ha ka shuki ba hakhlieh duh jong ka Ri” ula ong.
U bah Metbah ula pynkynmaw ruh ba ka UDP bad ki MLA kila ai ka jingkyrshan ia u Purno A Sangma, Lamphang barim ka Lok Sabha ha ka por ba u iakhun ia ka Election President.
U Nongialam ka NPP bad Symbud Myntri Rangbah ka Jylla bah Prestone Tynsong Ula pyntip ba Shen u Myntri Rangbah ka Jylla Conrad Kongkal Sangma un sa khot ia ka jingialang jong ka MDA ban kyrpad ia ki party ba don ha ka kynhun ba kin kyrshan ia ka kyrtong jong ka NDA.
“Nga sngew sarong bad nga iaroh ia ka BJP ba ka burom ia ka jingsngew jong ki paid Riewlum ha ka Ri. Kum ka NPP, ngi kyrshan ia kane bad ngi ai ka jingkyrshan ba pura ia ka Murmu kum ka kyrtong” ula ong haba bynrap ” Ka jingthrang jong u (L) Purno A Sangma ka la urlong shisha”.
U MLA ka BJP bad Myntri barim ka Jylla Bah A.L Hek ula iaroh ia ka sorkar NDA hapoh ka jingialam u Myntri Rangbah Duh ka Ri u Narendra Modi ba ka jied ia ka Longkmie na ka jaidbynriew Riewlum ban long ka kyrtong President.
“Ka thong jong ka BJP hi ka long ban kyntiew bad pynkupbor ia ki paid Riewlum ka Ri” ula ong.
Ha kajuh ka por, u Nongialam bad MLA ka All India Trinamool Congress (AITC) na Mawsynram Bah Himalaya Shangpliang ula ong ba kane kan dei ha ka sien ba nyngkong ha ka histori jong ka Ri ba na Longkmie na ka jaidbynriew Riewlum kan shah jied kum ka kyrtong ban iakhun ia ka elekshon President.
“Da ka jingshemphang jong ka Murmu, kan SA kyntiew bha ia ka long rynieng ki Kynthei hapoh ka Ri.Kan sa pynkupbor bad kan sa pynshlur shibun ia ki Kynthei paid Riewlum khamtam jong ka thain Shatei Lam Mihngi ka Ri” ula ong.
