Shillong, Jylliew 24: U Symbud Myntri Rangbah ka Jylla Bah Prestone Tynsong ula pyntip baka kynhun jong ka Inter-Ministerial Central Team (IMCT) kin sa hiar jurip lashem taiew ia ki jaka ba shlei um ha Jylla ban lum jingkhein ia ki jingpynjulor ka bor ka mariang.
“Ka IMCT kan sa wan poi ha ka taiew ban wan sha Jylla. Kan sa hiar jurip ia ki jaka ba shah ktah bad hadien kane kin sa aiti ia ka kaiphod sha ka Sorkar India” ong u Bah Prestone haba iakren bad ki nongthoh khubor hynne ka janmiet sngi thohdieng.
Haba pynpaw ba ki jingpynjulor jong ki bor ka mariang ha Jylla kala kot ia palat T.300 klur, u Bah Prestone ula ong “Nga thikna ba ka Sorkar India kan ai ia kane ka pisa bad iarap ia ngi ha kaban maramot biang ia ki jingpynjulor ia ki nongkynti jong ki riew shimet bad jong ka Sorkar ruh kumjuh”.
Ha kawei ka liang, ula ong ba ka song pisa ba T. 300 klur ka lah ban nym dap. “Mynta ka sngi ngi la bthah ia ki Tnad ba dei khmih kynthup ka Tnad kam rep ba kin lum jingkhein ia ki jingpynjulor kat kum ka kam ba ki khmih bad kin sa shong lang bad ka Tnad Revenue ban pynbeit ia kane ka kam” ula ong.
Haba phai sha ki surok, u Symbud Myntri Rangbah ula pyntip ba ka Tnad PWD kala dep khein ia ka jinglut jingsep katba ka tnad MeECL ka dang lum ia ki jingkhein halor ki jingjulor namar ki don bun tylli ki jaka bas ha kyndong ki bym lait shuh ban leit.
“Hynrei ki Ophisar ki dang pyrshang ban ioh ia kine ki jingkhein haduh mynta” ula bynrap.
