Guwahati, Jylliew 25:Ki nongshong shnong ha ka thain shathie ka Assam hapoh Silchar ki la ngat sa kawei pat ka jingeh ka ba khraw, kata ka jingbym don shuh ki jaka ki ba rkhiang na ka bynta ban thang ia ki met iap namar ka jingshlei um.
Ki briew la iohi katba ki dang ap ha ryngkat ki met iap jong ki ba ieit ba thoin hapoh ki iing ki sem, kata da ka ba wad ia ki lad jingiarap. Katba katto katne la iohi ba ki dang rah ia ki metiap ha ki lieng kynda bad wad ia ki jaka rkhiang ban pyndep ia ka jingleit on thang.
Haduh mynta kane ka jingshlei um kam pat shym la ailad ia ki nongshong shnong ba kin khih ki ksar, kata wat hadien ba na ka liang ki bor synshar jong ka district kynthup ia ki dkhot ka tnat NDRF, SDRF kumjuh ki shipai suin ki la iashim bynta shitrhem ha ka ba iadei bad ki kam pyllait im bad aijingiarap sha ki nongshong shnong.
Ki nongshong shnong hapoh Silchar mynta ki la iaksaid ha ka ba iadei bad ka jingdonkam ia ka umbam um dih bad ka bam ka dih, bad da ki hajar ngut ki dang sahkut halor ki tnum iing hadien ba ki iing ki sem jong ki, ki la shong halor jong ka um.
Watla ki bor district ki la pyrshang ban pyndonkam da ki liengsuin helicopter na ka bynta ban pynhap ia ki mar bam mar dih bad kiwei pat ki jingdonkam, hynrei na ka liang ki nongshong shnong kim shym la lah ban leit shim ia kine ki song jingiarap ki ba la hap hapoh ki jaka um namar ka jingbym don ia ki tnum iing ki ba madan lane ki madan ki ba rkhiang ban pynhap ia kine ki song jingiarap.
