Kohima, Naitung 05:Ka Janata Dal-United (JD-U) kan ia aireng ha kane ka ilekshon assembly ka ban wan ha Nagaland khlem kano kano ka jingiateh lok, ong ka party ha Patna hynnin ka sngi Nyngkong.
U national President ka party, u Rajiv Ranjan Singh ia u ba la tip bha kum u Lalan Singh u la ong ba ka JD-U ka la sdang ban pynkhreh na ka bynta kane ka ilekshon ka ban wan ha Nagaland.
“Ka party jong ngi ka la iakhun ha ka ilekshon assembly ha u 2018 ha Nagaland ha ka ba ka la lah ban ioh 5.6 percent ki vote bad jop ruh kawei ka seat. Ha kane ka kynti ka ba mynta ngin ia aireng ha kane ka ilekshon da ka jingthmu ban jop kham bun ki seat bad ban ioh palat ia ka 6 percent ki vote khnang ban ioh ia ka jingithuh kum ka regional party ha ka jylla,” ong u Singh.
“Ngi la iatreilang bad ka BJP ha Bihar. Ngi la iakhun tang marwei ha ka ilekshon assembly ka ba la dep ha Manipur bad Arunachal Pradesh bad ioh ia ka jingithuh kum ka regional political party ha kine ki artylli ki jylla. Ngin leh ia kajuh ha Nagaland bad ruh ban nang pynkhlain shuh shuh,” ong utei u nongialam ka JD-U.
Ka party JD(U) ba la lamkhmat da u Myntri Rangbah (CM) ka Bihar u Nitish Kumar ka la ioh haduh palat 10.75% vote bad jop hynriew na ki 60 tylli ki seat ha Manipur ha ka ilekshon assembly ka ba la long ha u bnai Lber 2022.
Kane ka party ka la ioh ia ka jingithuh kum ka party ka jylla ha Arunachal Pradesh hadien ba ka la ioh haduh kumba 9.88% ki vote bad jop 7 na ki 15 tylli ki seat ha ka ilekshon assembly ha u 2019.
