Guwahati, Naitung 5: U kyrtong liang pyrshah u ban ia aireng ha ka ilekshon president jong ka ri u Yashwant Sinha u lah ban pynlong ka jingwan jngoh sha Assam shi bynta jong ka jingleit jngoh ba lai sngi, 9 haduh ka 11 tarik mynta u bnai, ong u nongialam ka Assam Pradesh Congress Committee (APCC) u Bhupen Borah hynnin ka sngi Nyngkong.
“Na ka liang ka seng congress ka la dep lypa ban shim ia ka rai ban ai ka jingkyrshan ia u Yashwant Sinha bad ki nongtrei ka party jong ngi kin synran ruh ia u ha kane ka jingwan jngoh sha kane ka jylla,” ong u Borah.
Ka Assam Congress ka la shim ruh ia ka rai ban khot sngewbha ia u nongialam ka Raijor Dal u Akhil Gogoi bad u nongialam ka CPI-M u Manoranjan Talukdar ban iasnohkti lang ha kane ka jingialap na ka bynta u Sinha.
Hynrei, watla katta katkum ki khubor la ong ba ka APCC kam shym la khot satia ia kiwei pat ki party sain hima ki ba dei na kiwei pat ki jylla sha kane ka jingialap.
Hapoh Assam ka party All Indian United Democratic Front (AIUDF) ba la lamkhmat da u Badruddin Ajmal ka dei ka party liang pyrshah ka ba ar ka jingpawkhmat da ka jingdon ia 15 ngut ki MLA bad uwei u MP ka Lok Sabha.
Ka Congress ka la iakhun ia ka ilekshon assembly ha ka snem ba la dep da ka ba iatreilang bad ka AIUDF. Hynrei hadien ka jingpulom ka ba khraw ka ba mih na kane ka ilekshon ka Congress ka la pynkut noh ia ka jingiateh bad ka AIUDF.
Na ka liang u Ajmal u la dep lypa ban pyni dak ban ai ka jingkyrshan ia ka kyrtong ka NDA ka Draupadi Murmu ha kane ka ilekshon jied president. Nalor kata na ka liang u Borah u la kyntait halor kano kano ka jingiakren bad ka AIUDF ha ka ba iadei bad kane ka phang.
“U Yashwant Sinha u lah ban iakynduh iano iano bad kino kino ki nongialam jong ki party sain hima ki lah ban iakynduh ia u. Ngim shym la iakren bad kino kino kiwei pat ki party sain hima bad iano ban iakynduh kan dei hi ka rai shimet ka jong u (Sinha),” ong shuh shuh u Borah.
