Shillong Nailar 22: Ka Joint Action Committee on Border of Meghalaya ne JACBOM kala pynkhreh mynta ban mudui noh da ka mukotduma sha Iingkashari Supreme Court kaba long pyrshah ia ka jingiasoi soskular Memorandum of Understanding (MoU) hapdeng ka Sorkar Meghalaya bad Assam ban pynbeit ia ka jingiakajia ha ki 6 tylli ki jaka ba don ka jingiakynad.
Ia kane la pyntip da u Nongialam ka JACBOM Bah Erwin K.Sutnga haba kren ha ka jingiakahih jong ki Sengbhalang na Ri-lum Garo, kiba la pynlong da ka jingiashong kyllain mungor hynne ka sngi nyngkong ha Nongbah Shillong ba dawa ia ka Sorkar ban bishar thymmai biang ia ka MoU.
Kine ki Sengbhalang kiba la wan pynlong jingiakhih ha Shillong ki kynthup ia ka Federation of Khasi Jaintia and Garo People (FKJGP), Association for Democracy and Empowerment (ADE), Achik Youth Welfare Organisation (AYWO), Federation for Achik Freedom (FAF), bad ka Niksamso Garo Community Organisation (NGCO).
“Nga la ioh ktien na u nongiasaid aiñ ha Delhi uba la pyntip ba ki Nongsaid ain kila pynbiang nadong shadong ia ki kot ki sla bad hapoh 10 sngi yn sa ujor noh da ka mukotduma ban pyrshah ia katei ka jingpynbeit pud” ong u Bah Erwin Sutnga.
U Bah Erwin ula ong “Hato ka Section 7 jongka Indian Independence Act kala kut namar ka Standstill Agreement bad Instrument of Acession ka ong”.
“Phi lah ban thaw aiñ halor kiei kiei baroh hynrei ym lah pat ban thaw aiñ ha kaba iadei bad ka Khyndew, Um, ki khlaw ki btap bad ka Excise ia kaba ym lah satia ban ktah. Ki jaka ki jong ngi ki hap hapoh ka Sixth Schedule Area bad ka sorkar jylla kan ym lah ban ktah ia kitei ki jaka khlem da ioh jingbit na ngi ne khlem da ioh jingbit katkum ka riti synshar ka ri bad shisien ba kila ktah khlem da iaid katkum ka riti synshar ka ri, kumta ka sorkar Meghalaya bad Assam kin don haka jingeh” la ong u nongialam ka JACBOM.
U President ka FKJGP u Bah Dundee C Khongsit u la ong, ki sengbhalang bapher bapher kila pynbor iaka sorkar ba kan shimkhia ban pynbeit noh ia u pud u sam khnang ba ki paidbah kiba sah ha khappud kin ioh shongsuk shongshngain, hynrei kaba sngewsih mynta ka long, ba kan kyrtoh kylla lada shu leh kyrkieh iaka rukom iakren pynbeit ia u pud u sam.
“Nga iohi ba ka sorkar Meghalaya ka jong ngi ka shah jem shaba palat bad ka soskular kaba la dep ban iasoi hapdeng kine ki ar tylli ki jylla ka long kaba noh shilliang bad ka jingiohnong ka khambun sha ka sorkar Assam ban ia ka sorkar Meghalaya” ula ong.
“U Myntri Rangbah u leh kyrkieh ban soi iaka MOU ban pynhun mynsiem bad ban pynkmen ia u Myntri Rangbah ka Assam” bynrap u Bah Dundee Khongsit.
U la ong, naduh ba sdang la kyntu iaka sorkar ba kadei ban shim lang iaka jingai jingmut jong ki paid nongshong shnong ha khappud, ki Hima bad ki District Council namar ha kaba khatduh hi kiban long sohpdung kin dei ki paidbah kiba sah ha kitei ki thaiñ.
U President ka FKJGP, Garo Hills Zone, u Pritam Arengh ula ong ba ki Sengbhalang kin sa leit ted ia ki jingkhang jong ka Iingkashari namar ka jingbym don ia ka jingle hok ia ki paidbah.
Ula kynnoh ruh ba ka Sorkar Jylla ka khlem shimkhia satia haba iadei bad ka mon u paidbah, ka histori jong ka jaka, ki jaidbynriew ba sah ka jingsynshar khadar ba jan ha kane ka jingiapynbeit pud.
Ha kane ka jingialang la ioh iaka jingkren na ki nongialam jong ka ADE, FAF, AYWO, HITO, JYF bad kiwei kiwei bad ki nongiashimbynta ha kane ka jingiakhih, kiba la rah ruh ia ki banner ba don ia ki jongthoh ba pynrem jur iaka sorkar Meghalaya.
