Shillong, Nailar 22 : Ka Mawlai Sports Club kala nang mareh shajan mynta sha ka thong lahduh jong ka Shillong Premier League da ka jingjop biang ia ka Shillong Lajong ha ka second leg ne ka kylla ba-ar da 1-0 kol ha ka jingiakhun ba long hynne ka sngi nyngkong.
Da kane ka jingjop ka Mawlai Sports Club kaba don hakhlieh duh jong ka miej iakhein point, kala tam mynta haduh 8 point ia ka Langsning kaba don ha ka kyrdan kaba ar. Ka Mawlai kala ialehkai haduh 10 sien ba ioh kamai haduh 26 point katba ka Langsning kala ialehkai 9 sien bad ioh kamai 18 point.
Ka Mawlai Sports Club ka sah mynta ban iakhun satang 4 tylli ki jingiakhun ha kane ka lympung bad kine ki long pyrshah ia ka Mawkhar, Ryntih, Rangdajied bad ka Langsning kaba wan ha ka kyrdan kaba ar.
Ha ka jingiakhun jong ka 1st leg ne kylla ba nyngkong, ka Mawlai kala iakhaid bad ka Mawkhar da 0-0 kol, kala pynbam ia ka Ryntih da 5-0 kol, jop ia ka Rangdajied da 1-0 kol bad jop ia ka Langsning da 2-0 kol.
Haba phai ka jingiakhun ba hynne ka sngi nyngkong pyrshah ia ka Lajong SC, ka Mawlai kala ioh ban thep ia kane ka shi kol lyngba u rang ialehkai Donlad Diengdoh uba la pynkhih ia ka jar ha ka minit kaba 25 jong ka kylla step.
Ha ka jingialehkai, baroh arliang ki la iakhun tyngeh khamtam lei lei ha ka kylla miet hadien ba ka Mawlai ka la ioh ban lamkhmat da 1-0 kol. Pynban tad haduh ban da kut ka por ialehkai, ka Shillong Lajong ka khlem lah satia ban pyniakhaid ia ka jingialehkai.
Kum ban shu pynkynmaw, ha ka jingiakhun jong ka kylla ba nyngkong ne first leg, ka Mawlai ka la jop da 1-0 kol ia ka Shillong Lajong.
Ka jingiakhun mynta ka sngi Ba-ar pat kan long hapdeng ka Nangkiew Irat pyrshah ia ka Langsning FC ha ka por 4baje janmiet.
