Shillong, Jymmang 20 : U Myntri Sorkar Marcuise N Marak ula pynkein shuh ia ka jingtyrwa ban leit study tour ka kynhun ka tnad Soil & Water Conservation sha United Kingdom, kaba long kat kum ka jingbthah u Myntri Rangbah Duh ban shim ia ki lad ban pynduna ia ka jingpynlut pisa.
“Haba iadei bad ki lad ban pynduna ia ka jingpynlut pisa kaba u Myntri Rangbah Duh ula bthah ia baroh ki Jylla, hangne ha Jylla jong ngi ruh, u Myntri Rangbah ila kyrpad ia baroh ki Myntri ba kim shim ia ki lad ki lynti ban pynduna ia ki jing pynlut pisa” ong u Marak haba iakren bad ki nongthoh khubor ha ka sngi Balang.
U Myntri u pyntip ba kane ka jingleit UK ka dei kaba la pynbeit na ka bynta ban leit peit bad shim ia ki jinghikai na ki water project kiba don jingiadei bad ka jinglong ka suinbneng.
“Nga la pynbeit ban leit sha UK bad ka kynhun jong nga na Soil & Water Conservation ban lum jingtip halor ki kam ba iadei bad ka jingkylla ka suinbneng bad ruh halor ka jingpyntreikam ia ki project pynlang um kiba pynshong nongrim na ki committee kiba lah ban leh eiei halor ka jinglong ka suinbneng.
Ia kane ka jingtyrwa lah dep ban phah sha u Myntri Rangbah ba un ai jingmynjur,hynrei la pynsangeh noh mynta hadien ka jingbthah ka Sorkar Pdeng.
Ula pyntip ba ka Jylla kala pyntreikam ia kane ka jingbthah. “Kumta, ngin ym leit shuh sha UK bad ngi lah bud ia ka jingkyrpad jong u Myntri Rangbah” ula bynrap.
