Shillong, Jymmang 20 : Ka jingpyntrei ia ka Iingdorbar Thaw Ain ba thymmai ha Mawdiangdiang kala iaid kat kum ka jing pynbeit, ong u Lamphang ka Iingdorbar Thomas A Sangma ha ka sngi Balang hadien ka jingialang bishar kam ha katei ka jaka.
Ha kane ka jingialang, kaba la pyniaid da u Lamphang, la wan ban iashimbynta da u Symbud Myntri Rangbah ba khmih ia ka Tnad Parliamenatary Affairs Bah Prestone Tynsong, ki Consultant, ka Project Management Consultant, bad ki Ophisar na ka tnad Public Works Department (PWD), IT Cell bad ka National Informatics Centre (NIC).
Ka jingialang kala iakren sani bha halor ka jingiaid jong ki kam bala pyntrei bad kiwei kiwei ki kam kiba don jingiadei bad ka project.
Hadien ka jingbishar, u Lamphang ula ong ba “ka jingiaid jong ki kam la shem ba ki long kiba ihun bad pynpaw ia ka jing sngewskhem ba ka jingpyntrei ia ka Iingdorbar Thaw Ain ba thymmai kan dep hapoh ka por kaba la buh”.
Haba kynthoh halor ka video ba saphriang dashen ba iadei bad ka tnum jong ka Iingdorbar ba thymmai, u Lamphang ula ong ba kane ka kam ka dei kaba la shu pynheh shaba palat pud bad ong ba kiei kiei kiba jia ki dei ki kiba sngewsih”.
Haba pdiang ia ki jingai jingmut, u Lamphang ula maham pyrshah ia ka jingpyntip ba bakla haba kyntu ia ki paidbah ba kin kiar na kaba pynphriang lane thep ha ki social media ia ki jingthoh ba khlem pynthikna kiba lah ban pynsngewthuh bakla bad ba pynjah burom ia ka tnad treikam jong ka Legislative Assembly.
