Shillong, Jylliew 14 : Ki hati khlaw kila pynjulor ia kawei ka iing ha shnong Joyfar kaba hap hapoh ka Betasing C&RD Block, South West Garo Hills ha ka miet sngi saitjain, hynrei donbok ba ki trai iing kila iohphet bad lait na ki jingma.
Kane ka jingjia kala jia ha ka por 11 baje mynmiet jong ka 13 tarik Jylliew.
Kat kum ki khubor, ki hati kila pynjulor lut ia ka kamra shet jingshet, pynpra lut ia ki tiar shet bad kyndang ia ka kamra kaba buh ia ki marbam kiba dei jong u Ketaki Hajong uba don 4 ngut ki khun kiba dang khynnah.
Ha kawei pat ka jingjia, uwei u hati khlaw ula iap na ka jingshah lympat bording ha ka thain Bordu, kaba hap hapoh ka Mawsynram C&RD Block, myn ha ka 11 tarik Jylliew.
Ki hati khlaw ki don da ka kynhun ha ka thain Mawsynram Block, ki dei kiba wan na ki thain Ranikor bad la iathuh ba mynta ki don ha ka thain Sonatola. Kine ki hati la antad ba ki dei kiba wan na Bangladesh lane na ka thain South Garo Hills.
