“Ka jingnang jingstad ka dei ka atiar ba khlain bor bha ha ka jingpynkupbor”, ong u Myntri ha ka Prof Pakem Award

Shillong, Jylliew 14 : U Myntri ka tnad Pule Puthi Bah Lahkmen Rymbui ula ong “Ka jingnang jingstad ka dang iai long ka atiar kaba khlain bor bha na ka bynta ka jingpynkupbpr bad ka jingpynkylla ia ka imlang sahlang” haba ai jingkren sha ki khynnah pule ha ka 1st Prof Barrister Pakem Academic Award bala pynlong da ka Jaintia Students’ Union (JSU), West Jaintia Hills District ha ka sngi Saitjain.

Kane ka jingai khusnam, ka dei kaba la pynlong ban ai burom ia ka nam u (L) Prof Barrister Pakem, kaba la wan iashim bynta da u Pro Vice-Chancellor barim ka NEHU Henry Lamon, MDC ka Jowai Central Andrew Shullai, Dr Didakamiwan Khonglah, khun u Prof Pakem nalor ki kmie kpa, ki khynnah pule ba ioh khusnam bad ki riew paidbah.

Haba ai jingkren hadien ka jingiathuh khana ia ki synniang jong u Prof Pakem sha ka pule dangle ka Jylla, u Myntri ula ai khublei ia ka JSU ba kala wanrah ia kane ka jingai khusnam.
Ula ong ba “ka dei ka jingai burom kaba paka tam ia uwei na ki riewstad kot bad u briew ba iohi jngai, kiba ki kam jong u ki dang iai bteng ban long kiba ai mynsiem ia ki pateng la pateng”.

“Ka jingnang jingstad kam dei tang ka dak lane ka jingioh degree” ong u Bah Rymbui sha ki khynnah pule.

“Ka dei ka atiar kaba khlain bor tam ha ka jingpynkupbor ia ki briew bad ka jingpynkylla dur ia ka imlang sahlang. Ia ka jingjop ba shisha la thew ym da ki jingjop ha ka pule puthi hynrei ha ryngkat ruh ka jinglong briew, ka jinglong nongialam bad ka jingshakri ia ka imlang sahlang”.

Haba kdew ia ka jingdonkam ban ithuh ia kiba leh bha, ula ong ba ka jingpyndon burom ia ki khynnah pule ba paw bha shakhamt “ka ai mynsiem ia ki khynnah ba kin ialeh ban long kiba tbit bad ka wanrah ia ka mynsiem ialeh kaba itynnad bad ka jinghikai kaba shirta”.
Ula bynrap ba “Ka lawei ka Meghalaya ka shaniah ha ka jingangnud bad ka jingjop jong ki samla. Pyndonkam hok ia kawei pa kawei ka kabu kaba don hakhmat jong phi”.

Ula kyntu ruh ia ki khynnah pule ba kin long “ki nongkit khubor jong ka jingkylla kaba bha bad synniang sha ka jingkiew bad ka roi ka par ka Meghalaya”.