Tura, Naitung 03 : U Myntri Rangbah ka Jylla Conrad K Sangma ryngkat u Deputy Commissioner ka West Garo Hills u Swapnil Tembe ki la pynhap pyrda ia ka lympung ialehkai jong ka 6th All Garo Hills Badminton Championship kaba la pynlong da ka Tura Badminton Association ia kaba la pynhap pyrda noh ha District Indoor Stadium Tura ha kane ka sngi Saitjain.
Ha katei ka lympung ialehkai kaba neh laisngi la wan ban shim bynta da ki nongïalehkai na kylleng ki bynta jong ka Rilum Garo.
Ha katei ka lympung ka la don ruh ka jingialehkai paralok hapdeng ka kynhun ialehkai jong u Myntri Rangbah ka jylla bad ka Badminton Association ha kaba ka kynhun jong u Myntri Rangbah ka la khur ia ka jingjop.
Haba kren ha ka jingialang, u Myntri Rangbah u la ong ba ka sorkar ka la trei borbah na ka bynta ki samla bad ka lawei jong ki.
U ong ruh ba ka Badminton Championship ha Tura kan iarap na ka bynta ban kyntiew shuh shuh ia ka kam ialehkai ha ka jylla.
“Kum ka sorkar ngi la pynleit jingmut ha ki kam ialehkai. Lyngba ka Sports Policy ngi la pyrshang bun ki lad ban kyntiew ia ki. Ngi Kyrmen ruh ba ki samla ka jylla kin ioh ia ka rynsan khnang ba kin ioh ban iaid ha ka lynti kaba dei,” u la ong da kaba banjur ban saiñdur ia ka bad phrang ia ka jingtbit jong ki.
Na ka liang ka MLA ka Selsella ka Ferlin Sangma ka la ai ka jingiaroh ia ki bor pynïaid kiba la lah pynlong ia ka Badminton Championship. Ka ong ruh ba ka sorkar jylla ka la buh hakhmat eh ban kyntiew ia ki kam ialehkai ha ka jylla bad ong ba ka lympung ialehkai kum ka Badminton kan iarap ban kyntiew shuh shuh ia ki jingialehkai.
Ki nongjop ha katei ka lympung :
Ha ka under -19 Girls Single) ka Lizalisha Ch. Marak ka la khur ia ka nam lahduh da kaba pynliem noh ia ka Sengte Wasa D Shira.
Ha ka under-19 Girls doubles, ka kynhun jomg ka Lizalisha Ch. Marak bad Amora D Sangma ka la pynliem ia ka kynhun jong ka Hrimbie Momin bad Ankita Paul.
Ha ka Men’s Singles, u Gitchiak Bregim ASangma u la ioh ban pynliem noh ia u Brainygo K Marak ban khur ia ka nam lahduh.
Ha ka Men’s doubles ka kynhun jong u Brainygo K Marak bad Chirag Agarwal ki la ioh ban pynliem noh ia ka kynhun jong u Gitchiak Bregim Sangma bad Mikkim J Sangma.
Ha ka thup kiba 45 snem shajrong (veteran men’s double) ia ka nam lahduh la rah da u Vikas Chongtam bad Sengrang D Shira hadien ba ki la pynliem noh ia u Swapan Kumar Das bad Sujeet P Marak.
Ha kane ka lympung u Sengchot Marak u la shah jied ban pdiang ia ka khusnam Player of the Tournament.
