Shillong, Naitung 03: Ki Pulit ka West Jaintia Hills hynnin ka sngi saitjain kila ioh bat ia 6 ngut ki nong Africa kiba thmu ban wan ialehkai phutbol ha East Jaintia Hills bad shem ba laingut napdeng jong ki, ki dei ki bym don satia ia ki kot ki sla.
Ki Pulit ka District kila ioh bat ia kine ki nong Africa na kawei ka kali Tourist Toyota Innova ba don u nombor ML05-T-3049, ha ki thain Ummulong.
Kat kum ka khubot Pulit la iathuh ba kine ki nong Africa ki dei ki rang ialehkai phutbol bad ki dei kiba thmu ban leit iashimbynta ha ka jingialehkai phutbol ha ka Shnong Mosiang Lamare.
Ki Pulit ki iathuh ba napdeng kine ki 6 ngut, lai ngut ki dei kiba don ia ki kot ki sla kiba biang bad la pyllait noh ia ki.
Kine ki laingut ki kyrteng u Enock Kwabena ba 29 snem na Ghana, u Oleleye Josehm Mayowa 26 snem na Nigeria bad u Moses Zutah ba 24 snem na Ghana.
Ki Pulit ki iathuh ba lai ngut pat ki dei ki bym don satia ia ki kot ki sla bad namar kane, ia kine ki briew la bat noh bad la pynngat ia ki hapoh ka case kat kum ki kyndon jong ka Foreigners Act.
Kine ki laingut ki kyrteng u Guilavogui Victor ba 25 snem na Guinea, u Kehinde Edris Olayimka ba 26 snem na Liberia bad u VidalLuis Chissana ba 25 snem na Mozambique.
