Nongpoh, K’lyngkot 29: Ka Balang Catholic jong ka Shnong Pahambir kaba hap hapoh ka Parish Nongpoh, ha ka 28 Kyllalyngkot, ka la pynhap noh ïaka lama jong ka jingrakhe dap 50 snem ne Golden Jubilee jong ka Balang.
La pynhap lama ia kane ka jingrakhe da u bah Balajied Rani MDC, Nongpoh haka jingiadon lang Rev Fr. Lawrence Nongkseh, Rev Fr. Charles Sangma, Rev Fr. Roland kharkrang , Rev Fr. Felix Aiban klein, Fr. Peter Syiemlieh Father Rangbah jong ka Parish Nongpoh lem bad kiwei kiwei ki riew rangbah.
Ia kane ka jingrakhe la sdang daka jingiaseng shakri mass da u Rev Fr. Roland Kharkhrang ha kaba u la ïoh ruh ban sam ïaki kyntien naka ktien jong u Blei sha ki paid riewngeit kiba la ïa donlang ha katei ka sngi.
U Rev. Fr. Roland Kharkhrang u la pashad ïa ki kyntien sha ki paid riew ngeit da kaba ong, U blei u la ai iaka mon kaba lait luid ha ngi ki briew, lada ngi mon ban leh ïaka ba sniew khlem ka jingpyn bor jongno jongno to kit hi maphi ïaka Pop bad lada ngi leh iaka ba bha khlem ka jingpynbor to ngin khmieh lynti ïaka bainong.
U la ong ruh, ka jing khot jingwer jong u blei lyngba kane ka sngi ka long to leit phai sha la iing da kawei pat ka lynti bad klet ïaka lynti kaba phi wan. U Fr. Roland hangne u la pynshai ruh ïa kitei ki kyntien kaba u mut ban ong ka long, to klet noh ia kiei kiei ki ba la dep la phi la kum leh Pop ne leh bakla haka lynti iaid hynrei to pynkylla noh ia la ka jingim da kaba phai sha ka lynti kaba bha bad sha ka lynti jong u Blei.
Haka janmiet jong kane ka sngi la ïoh ruh ban pynsngew pynsngap ïaki sur jingrwai kiba thiang kiba la rwai da ki khun samla jong ka Balang bad ha kajuh kapor la ïoh ruh ban pyni ïaki jingshad bad jingtem tynrai bad la ïoh ruh ban pynkup burom naduh ki Father, ki sisters, ki Rangbah Balang, Ki Longkmie Longkpa, ki Riew tymmen kiba la long Kristan nyngkong ha katei ka shnong, ki riew rangbah kiba la don kti ban ïarap ïaka Balang bad kiwei kiwei.
