SHILLONG, OCT 15: U MLA ka UDP bad u Myntri Sorkar barim ka jylla uba khmih ia ka kam jngohkai u Bah Paul Lyngdoh ha ka sngi Palei ula ong, ba la ioh ia baroh ka Environmental Clearances na ka bynta ka jingtei ia ka Shillong Ropeway Project naduh u snem 2022 bad ula buh jingkylli kylla ia ka por jong ka jingmih jong kane ka jingpyrshah mynta ha u snem 2026.
“Nga kwah ia phi ba phin pule bniah shwa, khmih ia ki kot ki sla kiba kongsan. Baroh ki Environmental Clearances la pan bad la ioh ha u snem 2022, ha ka por ba nga long u dkhot jong ka District Council. Hadien katei la ioh ruh ia ka jingbit na ka MoEF” la ong u Bah Paul.
Ula ong, ba ia ka No Objection kadei kaba la rah naduh ha ka por kaba dang sdang.
“Ki Dorbar kiba dei khmih kim shim la pyrshah eiei ha kano kano ka por ruh, u MLA ka thaiñ ruh um shim la pyrshah eiei ha kano kano ka por ruh. Ia kane lah dei ban pynpaw naduh u snem 2023, 2024 bad 2025. Balei kine ki kynhun kila pyrshah mynta ha u snem 2026?” ula buh jingkylli.
U Bah Lyngdoh ula kdew ruh “Ki Environmental Clearances kidei ki sienjam kiba nyngkong eh kiba hap ban shim ha u snem 2022, ia kaba ngam shim la dei satia wat tang u dkhot jong ka ïingdorbar thawaiñ ka jylla”.
Haba kylli la kadei ka jingkwah jingmyntoi jongno re jongno na katei ka jingiakhih, ula ong “Ngam ju sngewtynnad ban bishar ia kino kino ki briew. Ngam tip la ki lah dep ban pule ia baroh ki kot ki sla kiba donkam ne kadei ba kila shah ialam bakla. Hynrei kala don pat ka por, ka por kaba biang bha, ban phah ia ki jingujor ne ia kano kano ka jingujor kaba ki don”.
Haba pynksan ia kane ka project, u Bah Paul Lyngdoh ula ong, “Hato phi tharai ba mano mano kiba bat ia ka kyrdan President of India kin mynjur ban rung ne don jingiadei bad kano kano ka projek kaban mih ka kynrum kynram? Ka nongshong shnong kaba nyngkong eh ha ka ri (President ka ri India), kala wan ban buh ia u mawnongrim na ka bynta katei ka project kaban iaid pyrshah ia ki kyndon iada ia ka mariang?.
Halor ki jingkynthoh ba ka jingleit thung dieng shawei kam lah ban mih bujli satia pat ia ka jingpynkhyllem ia ki dieng ha u Lum Shyllong, ula ong, “Da kaba iaid thik pa thik la leh ia kiei kiei baroh. Nga iohi ha ki kot khubor ba ym shim la don mano mano ruh na ka sorkar kiba kloi ban kren, kadei tang kata ka jingeh. Nga ju iai pyrkhat, nga iai kren bad nga iakren ruh mynta bad phi. Kumta nga tharai hangno ka don kum katei ka jingduna jong ka jingiakren”.
