Guwahati, K’lyngkot 29 : Ka Asom Yuba Jatiyatabadi Yuva Chatra Parishad (AJYCP) lem bad ki seng bapher bapher, hynne ka sngi Nyngkong, kila pynlong ia ka jingiakhih ha Guwahati ban dawa pyntreikam noh ia ka Inner Line Permit (ILP) ha Assam nalor ban pynduh noh ia ka Citizenship (Amendment) Act (CAA).
Da ki spah ngut ki dkhot ka AJYCP bad ki seng bapher bapher kila iarah placard bad banner nalor ka jingpyrta slogan pyrshah ia ka Sorkar u Himanta Biswa Sarma bad ia ka Sorkar Pdeng, haba dawa pynduh pyndam noh ia ka CAA.
Kane ka Seng kala kut jingmut ruh ban nang pynkhlain ia ka jingiakhih pyrshah ia ka CAA ha kine ki khyndiat sngi ban wan.
U Nongialam ka AJYCP ula ong ba ka jingdawa ba hakhmat eh jong ka seng ka dei kaba la dep pynsngew sha ki bor Sorkar bad bynrap ba kane ka jingiakhih kan iai bteng tad haduh ba ka Sorkar Pdeng kala weng noh ia ka CAA.
Nalor kane, ka AJYCP ha ryngkat ki seng jong ki samla pule ka Assam bad kiwei kiwei, kila dawa ruh ban pyntreikam noh ia ka Inner Line Permit (ILP).
