Shillong, Risaw 16: U MLA ka Ranikor uba dei ruh u MDC ka Langrin u bah Pius Marwein u la ai jinghikai kylla ia u Chairman ka KHADC Bah Strong Pillar Kharjana bad ia u Chief Executive Member Bah Winston Tony Lyngdoh halor ka jingkynriah party jong u, da kaba pynskhem ba ka district council kam don ka Tenth Schedule lane ka ain pyrshah ia ka jingkyntiap seng.
U bah Marwein, uwei na ki 8 ngut ki MLA barim ka UDP, kiba dang shu pyniasoh ialade sha ka BJP, u la ong ia kane halor ka jingkren jong u Bah Kharjana, ba um shym la pyntip satia la u dei u MDC ka UDP ne ka BJP.
“Nga pynrem ia ka jingkren jong u chairman ba ong MLA ka BJP bad MDC ka UDP. Mynta ka sngi hapoh iing dorbar, nga pynrem ruh ia u CEM uba pyndonkam ia kijuh ki kyntien,” la ong u Bah Marwein hadien ka dorbar Tlang jong ka council ha ka sngi Palei.
U la ong ba kam don kano kano ka jingkhang jong ka aiñ ban kynriah seng hapoh ka council.
“Haduh mynta ka sngi, kam pat don ka Tenth Schedule ha district council, kam pat don ka ain ban pyrshah ia ka jingkyntiap seng, kaba mut ngi lah ban leit sha kano kano ka party.Lada u kwah ba ka dei ban don, te u dei ban thaw shwa ia kum kane ka aiñ, nangta ngin sa pyntip sha ki,” u la ong.
Haba pynpaw ba ka jingïadei jong u ka long kaba shai, u Bah Marwein u la ong, “Nga la rung sha ka BJP.Nga dei u MLA bad MDC ba la jied, kumta nga dei u MDC jong ka BJP bad nga dang ïai bteng ban long ha council ruh kumjuh.”
U la kdew ruh ia ki jingjia ba la dep.
“Lada phi peit ia ki samoi treikam ba mynshuwa, ki don ki MDC kiba kylla party man la ki bnai, wat man la u snem, hapoh ka san snem.Ki dei ban pyrkhat ia kita ki jingjia kiba la dep.Kam shym la don ain pyrshah ia ka jingphet seng hapoh ka council.Ai ba kin wanrah shwa ia ka ain, nangta ngin sa peit,” u la bynrap.
