Shillong, Naiwieng 29: Khyndaiphew ngut ki pulit jong ka thain Shatei Lam Mihngi kila pyndep ia ka jinghikai pyntbit na ka North Eastern Police Academy (NEPA) bad ka Passing-out Parade, kaba la tip ruh kum ka Dikshant Parade, la pynlong na ka bynta jong ki hynne ka sngi Thohdieng.
Kine kiba la pyndep ia ka jinghikai ki kynthup ia ki 27 ngut ki Deputy Superintendents of Police (Dy SP Probationer), 2 ngut ki Inspectors, 56 ngut ki Sub-Inspectors (SI) bad 5 ngut ki Assistant Sub-Inspectors (ASI) kiba na ka jylla Meghalaya, Manipur, Assam bad Nagaland.
Kitei ki kynthup ia ki 6 ngut ki Dy SP bad 40 ngut ki SI na Meghalaya, 14 ngut ki SI na Assam, 13 ngut ki Dy SP bad 6 ngut ki SI na Manipur bad 8 ngut ki Dy SP bad 3 ngut ki SI na Nagaland.
Kine ki ophisar kila sdang ia ka jingioh jinghikai ha ka 4 tarik u Nohprah 2023 bad la pynrung noh ia ki ha ka kam pulit ha katei ka jingialang, ia kaba la khmih da u Myntri Rangbah ka jylla Meghalaya u Conrad K. Sangma.
Haba kren ha ka jingialang u Conrad Sangma ula iaroh ia ka jingnoh synniang jong ka NEPA ha kine ki 46 snem kiba la leit noh, ha kaba kala ai jinghikai ia palat 36,088 ngut ki pulit. Ula banjur ia ka jingkordor ban long kiba sngewrit ha ka kam pulit bad ula kyntu ia kine kiba la pyndep ia ka jingioh jinghikai ba kin ai ka jingshakri naduh mynsiem bad ban sngewthuh iaka jingsngew jong kiwei ruh.
“Mynta haba phi lah ioh ia ka kyrdan ban bat ia ka bor, phi dei ban iai kynmaw ia ka jingkongsan ban long kiba sngewrit. Ieng ha ka nongrim, shakri da ka jingaiti bad iengskhem ha ka jingshisha ia ka jingkitkhlieh kaba la pynkhamti ha phi” la kyntu u Conrad ia kiba la pyndep ia ka jingioh jinghikai.
Ia ka parade la ialam da u Dy SP Probationer D. Theingam Thangal jong ka Manipur Police Service, ha kaba la pyni iaka jinglong ryntih bad jingioh iaka jinghikai kaba eh na ka NEPA. U Danesh Rana, IPS, Director ka NEPA, ula pyntian smai ia kitei ki ophisar kiba la pyndep ia ka jingioh jinghikai.
Ha kane ka jingialang la ia donlang ki heh ophisar naka jylla Assam bad Meghalaya, ki nongshah khot kyrpang, ki bahaiing bahasem jong ki pulit kiba la pyndep ia ka training ryngkat bad ki nongtrei jong ka NEPA bad kiba ioh jinghikai ha ka Explosives and Bomb Disposal Course bad ka Training of Trainers (ToT) program halor ka Disaster Management.
Ha kane ka jingialang la pyni ruh iaka jingiengskhem bad iaka jingtbit jong ka NEPA ha kaban pynmih ia ki ophisar kiba tbit kiba kloi ban shakri ia ka imlang sahlang bad ban pynkhlain ia ki bor aiñ ha ka thaiñ.
