Shillong, Nov 29: Ka Baroda hynne ka sngi Thohdieng, kala kamai haduh 608 run bad hap tang 6 wiket bad kala tam da 430 run ia ka Meghalaya ha ka sngi baar jong ka U-19 Men’s Cooch Behar Trophy Elite Group A, kaba la long ha MCA Ground ha Polo.
Ka Baroda kaba la kamai 55 run khlem don ba Out hynnin ka sngi Palei hadien ba ka Meghalaya kala kamai 178 ruh bad hap lut ki nongtied, kala bteng biang ban leit tied hynne ka step bad ki arngut ki nongtied ka Baroda kiba la mih nyngkong kila pynneh iaka wiket bad kila kamai haduh 274 run..
U Nitya J Pandya, u kapten ka Baroda ula kamai 177 run na ki 183 bol hashwa ba yn shah pynhap ha u Gaurav Thakuria. U Nitya udei u nongialehkai uba mihkhmat ia ka kynhun jong ka India ha ka U-19 ha kaba ula ioh ban kamai 2 tylli ki Half-Century ne palat ia ka 50 run pyrshah ia ka Australia dang shen.
U Smit Rathva, ula kyrshan ia u Nitya, ula sdang ban ialehkai bha ha kaba ula ioh kamai 201 run na ki 245 bol hynrei ula shah pynhap noh ha u Angkit Tamang uba la ioh ban khur 2 wiket.
Ka Baroda kala bteng ban ialehkai bha bad sa uwei pat u nongtied u Vishvas ula kamai 143 run na ki 127 bol.
Na ki nongkawang bol ka Meghalaya dei tang u Salchang M Sangma uba la ioh khur 3 wiket bad ai 83 run bad ula ioh ruh ia kabu ban ioh ia ka hat-trick.
