Shillong, Rymphang 20: U Nongialam ka Congress Gaurav Gogoi ula ong ba lada ka Congress ka wan haka bor, u MP ka Shillong ma Vincent Pala u dei uban shimti kum u Myntri Rangbah ka jylla Meghalaya.
U Gogoi ula ong, kat kum ka jingsngew ka jong u shimet khamtam haba ula ithuh bad iohi ia ka rukom treikam jong u Bah Pala kum u Myntri Khynnah ka sorkar Pdeng, u shem ba u long u nongialam uba biang bha ban ialam iaka jylla kum u Myntri Rangbah lada ka Congress ka wan ha ka bor.
Ula pynshai ruh ba katei ka jingkren ka jong u ka dei ka jingsngew shimet bad kam dei satia ba ka seng Congress kala rai ba u Bah Pala yn long u Myntri Rangbah ka jylla lada ka Congress ka wan ha ka bor.
“Ka seng Congress kan ieh beit ha ki nongthawaiñ ki jongka ban jied ia u nongialam ban shimti iaka shuki Myntri Rangbah lada ka Congress ka wan haka bor haka jylla Meghalaya” la pynshai u Gogoi haba iakren bad ki nongpathai khubor.
