Pynbna ka MFA ban pynsdang ia ka Women’s State League ha ka 20 Nailur

Shillong, Nailur 07: Ka Meghalaya Football Association (MFA) kala pynthikna ba kan sdang pynialehkai ia ka Meghalaya Women’s State League ha ka 20 tarik u Nailur, ha kaba yn plie pyrda ia kane ka lympung iakob ialehkai da kaba pynlong ia ka jingiakhun ha SSA Stadium, Shillong.

Kane ka lympung ialehkai kaba nyngkong eh na ka bynta ki kynthei kan wanrah lang ia ki kynhun ialehkai kiba paw na ki district bapher bapher kiba la pyniasoh bad ka MFA.

Ka MWSL kan plie lad ia ki kynhun ialehkai ka Meghalaya ban iashimbynta ha kane ka Indian Women’s League Second Division (IWL 2) ha ka sien kaba nyngkong eh.

Ka rukom pynwandur ia ka MWSL kadei katkum ka jingpynshong nongrim halor ka jingjop ban pynlong ia ka Meghalaya State League, ka jingiakob ialehkai na ka bynta ki shynrang, kaba la kyrshan da ka sorkar Meghalaya.

Ki district association kiba la pynlong ia ka Women’s Leagues kin lah ban phah ia ki kynhun kiba long ki lahduh bad kaba wan baar sha katei ka lympung iakob ialehkai.

Kin don 13 tylli ki kynhun kiban iashimbynta na ki 8 tylli ki association kiba la don ha ki 3 tylli ki Zone kaba kynthup ia ka Khliehriat, Shillong bad Tyrsad.

Kine ki kynhun ki kynthup ia ka Na Rympei Football Academy bad Attacker Youth Club Pahamsyiem na Ri-Bhoi District Sports Association, Laitkor SC bad Pay For Right Football Academy na ka Shillong Sports Association, Jakrem SC bad Mawten SC na ka Mawkyrwat District Sports Association, ka Young Sports Social & Cultural Club bad ka Bright Future SSCC na ka Pyndengumiong District Sports Association, ka Diengshynrum SC na East Jaintia Hills District Football Association, ka Mawlum Tyrsad SC bad Mawsawrit SC na ka Tyrsad Area Sports Association, ka Lapalang SSCC na ka Riwar Mihngi Football Association bad ka Chirupheiwei Nongkynrih FC na ka Laskein Block Sports Association.

Ia ki jingtip kiba kham bniah yn sa pynbna da ka MFA ha kine ki sngi ban wan.