Nongpoh, Rymphang 14: Ka Meghalaya Cricket Association, ha ka sngi Palei, kala pynbna ia ka result jong ka elek shon thung nongkitkam ha ki lai tylli ki kam ba lait hapoh ka synjuk bad u Bah Rayonald Kharkamni, ula shah jied kum u Honorary Secretary ka Synjuk.
Ia kane ka result la pynbna da ka Apex Council jong ka MCA ha ka 13 tarik Rymphang hadien ba dep bishar ia ka kyrteng jong ki laingut kiba thep kyrteng ba ki dei kiba bit ba biang.
U Bah Rayonald Kharkamni, Vice President ban leit noh, ula shah jied kum u Honorary Secretary katba u Sengnab Momin dkhot (Councillor) bala kut ka por, ula shah jied kum u Vice President.
Ia kane ka elekshon la hap pynlong hadien ba u Honorary Secretary Bah Gideon Kharkongor, ula pynpaw ia ka jingkwah ban iehnoh ia ka kam namar ka jingnang kynton kam ha ka kam ba u trei. Namar kata, la jied noh ia u Bah Gideon kum u dkhot (Councillor).
Bah W. Kyllep, IAS (Retd) u ba dei ruh u Chief Electoral Officer barim ka sorkar jylla, u la shim ia ka bynta ban pynbna ia ka result bad ban aiti ruh ia ki syrnot sha ki nongkitkam kiba thymmai jong ka MCA.
