Shillong, Rymphang 06 : U Myntri Rangbah Conrad K Sangma hynne ka sngi Palei, ula pyllait paidbah ia ka jingshakri jong ki kali kit nongpang (health shuttle service) ka PA Sangma International Medical College & Hospital (PIMC) ba kin shakri ia ki nongpang bad ki nongap.
Ia kane ka jingshakri jong kine ki kali la pyllait ha ka jingiadon ryngkat ka Myntri ka koit ka khiah kong Ampareen Lyngdoh, u Chancellor ka USTM M Hoque bad kiwei kiwei.
Kine ki kali ki dei kiba la buh ban kit ia ki nongpang bad ki nongap pang ba kin wan sha hospital, kaban pynthikna ba kin ioh ia ki lad jingsumar kiba biang la ka dei na ki jaka nongkyndong ne jaka sor.
Haba kren ha ka jingialang, u Myntri Rangbah ula iaroh ia ka PIMC halor ka sienjam ba kala shim. “Kane ka kam ka dei kaba donkam bha ban shim. Wat hapdeng ki jingeh ban seng ia ka medical college, kane ka skulbah kala shim ia ki sienjam kiba paka bha ban pynjanai ia ka jingshakri ha ka koit ka khiah ia u paidbah. Ka jingshakri jong kine ki kali kan ym pynmyntoi tang ia ki paidbah na nongkyndong hynrei kan pynkhlain ruh ia ka lad ai jingsumar ha Shillong bad kiwei kiwei ki jaka” ula ong.
Ka Myntri Kong Ampareen Lyngdoh kala ong “Ka leit ka wan ka dang don ka jingeh ba khanglad hakhmat eh ha ka jingioh ia ki jing sumar ha ka por kaba biang. Ka jingwanrah ia ka jingshakri jong kine ki kali kan wanrah ia ka rukom treikam kaba la buh ryntih ban pynsuk ia ka leit ka wan jong ki nongpang khamtam eh kito kiba wan na ki thain kiba bun ki jingduna” kala ong.
Kane ka jingshakri jong ki kali kit nongpang kan sdang shwa da 10 tylli ki kali, 5 tylli la buh kyrpang na ka bynta ki jaka nongkyndong bad 5 tylli ia ki jaka sor kynthup ka Shillong. Ia mynta, artylli ki kali kit nongpang kin treikam hapoh Shillong.
Ban kham pynsuk ban ioh ia ka jingshakri jong kine ki kali, ka PIMC ka don jingthmu ban pyndonkam da ka mobile application, kaba ki nongpang ki lah ban pyntip lypa ia ka jingdonkam kali haba ki donkam.
 ka PA Sangma International Medical College & Hospital (PIMC) ba kin shakri ia ki nongpang bad ki nongap.){kind=link}