Shillong, Rymphang 06 : U Lamphang ka Iingdorbar Thaw Ain Thomas Sangma ula pynbna ba ka Dorbar Mang tyngka jong sdang naduh ka 28 tarik u Rymphang haduh ka 13 tarik Lber.
Kane ka Dorbar Mang tyngka kan neh haduh 10 sngi ha kaba lai sngi la mang sha ki kam ki MLA shimet shimet bad hynriew sngi sha ki kam ka Sorkar Jylla.
Kane ka dei ka rai kaba la mih na ka Business Advisory Committee (BAC) ka Iingdorbar Thaw Ain ba long hynne ka sngi Palei, kaba la wan iashimbynta da u Symbud Myntri Rangbah ba khmih ia ka Parliamentary Affairs Bah Prestone Tynsong, u Nongialam ka Liang Pyrshah Dr Mukul Snagma, u Nongialam ka Trinamool Congress Bah Charles Pyngrope, u Nongaibuit ka Sorkar Bah Lahkmen Rymbui bad kiwei kiwei.
Haba kylli la ka jingaipor ba 3 sngi kala biang mo na ka bynta ki kam jong ki MLA shimet shimet, u Lamphang ula ong “Hooid, balei kam biang?. Lai sngi ban iakren ia ki kam ki MLA shimet shimet kala biang palat. Kane ka dei ka Dorbar Mang Tyngka-lai sngi yn buh ban iakren ia ka mang tyngka bad 2 sngi ia ka jingkrem lamphrang u Lat ka Jylla. Ka dei ban biang palt”.
U Lamphang ula kular ba ki dkhot kin ioh bha ia ka lad ban iashimbynta ha ki jingiatai. “Ka por kan pahuh ia baroh ban iashimbynta. Lada jia ba duna ka por, ngi kmen eh ba pynjlan ia ka dorbar wat ha ka sngi Thohdieng” ula bynrap.
