Shillong, Naitung 27: U Myntri Rangbah ka Jylla Conrad Kongkal Sangma, hynne ka sngi balang, ula pyllait paidbah ia ka skhim ai khusnam song pisa (Cash Award) sha ki Nongialehkai bad ki Coach jong ka Jylla, kiba leit ialehkai ha ki lympung bapher bapher ka Pyrthei (International) haduh ki lympung ialehkai ha Jylla ( State & Regional Level) jong u snem naduh 2017-2018.
Happy that we are able to recognise our achievers & extend the cash awards to our sportspersons of the State who have brought laurels to Meghalaya. I encourage them to follow their passion & work hard so they can achieve greater success in the future@ianuragthakur pic.twitter.com/cb8rgqKI2R
— Conrad Sangma (@SangmaConrad) July 27, 2022
U Myntri Rangbah ha kane ka sngi, u la sam ruh ia ka cheque sha ki 231 ngut ki nongialehkai ka Jylla kaba kot haduh T. 81,04,250.00 ia kaba 73 ngut ki dei kiba ialehkai ha ki jingialehkai ba ju pynialehkai ha ka lympung Olympics (Olympic Sports Discipline) bad 158 ngut kiba ialehkai ha ki Non-Olympic Sports Discipline kaba kot haduh T. 66,96,250.00.
U Myntri Rangbah ula pyllait paidbah ia kane ka Skhim ha ka jingialang bala pynlong ha U Soso Tham Auditorium, Shillong ha ka jingiadonlang u Myntri kam ialehkai Bah Banteidor Lyngdoh, u Commissioner ka Tnad ialehkai Dr Vijay Kumar bad ki Heh Ophisar na ka Tnad ialehkai bad ka Meghalaya State Olympic Association.
Ha kane ka jingialang, la pynkup burom ruh ia baroh ki rang bad ki thei ialehkai jong ka Jylla kiba la wanrah ia ka nam ka burom ia ka Jylla.
Haba kren ha ka jingialang ba iashimbynta da ki rang bad ki thei ialehkai, u Myntri Rangbah ula ong ba kane ka jingpynkup burom ka dei kum ka dak ban ong khublei shibun ia baroh ki nongialehkai kiba la ioh kheit ia u soh ka jingjop kampher katno kila ioh ia ki jingkyrshan na ki riew shimet, ki kynhun bapher bapher ne ka Sorkar.
“Kane ka dei tang ka dak ban sngewnguh ia ka jingtrei shitom jong phi bad ia ka nam bad ki takma ba phi la ioh ialade bad ia ki Kynhun ialehkai kaba mihkhmat ia ka Jylla ruh” ula ong.
U Conrad u ong ba ka Sorkar ka sngewthuh ia ki jingtynjuh ba ki Nongialehkai ki mad bad ka tip ruh ia ki jingmyntoi ba lah ban ioh na ki jingialehkai bad ka jingdonkam ban kham leh bha shuh shuh khnang ban nang kiew bad nang plie lynti shuh shuh ban jam shakhmat.
U Myntri Rangbah ula ong ba ki don shibun ki kam kiba hap ban iakren bad shibun ki jingtei kiba donkam ban wanrah ha Jylla.
“Nga sngewkmen ban pyntip sha phi ba ka Sports Policy jong ka Jylla kala pyrshang ban leh eiei ia kine ki jingduna baroh” ula ong.
Kat kum kane ka skhim ai khusnam song pisa, shisien ba ki nongialehkai kila shah jied sha ka National team, kin don bun ki khusnam ban ai sha kine ki nongialehkai nalor ka khusnam ba ai da ka Sorkar Jylla bad kine ki kynthup ia ka North Eastern Council (NEC) Chairman’s Award for Excellence bad ka song bala buh ia kane ka long – Olympic Games- T. 100 lak ia kiba ioh takma ksiar, T. 50 lak ia kiba takma rupa bad T. 30 lak ia kiba ioh takma rynnong.
Ka khusnam song pisa ia ki nongjop jong ka National Games ka long T. 30 lak ia kiba ioh takma ksiar, T. 10 lak ia ki takma rupa bad T. 5 lak ia kiba ioh takma rynnong.
Ki Nongialehkai jong ka Jylla ki lah ruh ban ioh ia ka khusnam song pisa na ka Ministry of Youth Affairs and Sport, ka Sorkar India lada ki ioh khur takma ha ki jingialehkai National Games, Asian Games, Commonwealth Games, World Championshop bad ki Olympic Games.
Ki Coach jong kine ki nongialehkai ba ioh takma ruh kin ioh lang ia ka khusnam song pisa.
