Shillong, Nohprah 29 : Ka Indian National Congress (INC) hynne ka sngi palei, kala pyllait ia ka thup kyrteng ba nyngkong jong ki 40 ngut ki kyrtong, ki ba la phah sha Delhi ban ioh jingmynjur ba kin mih aireng ha ka elekshon MLA-2023 hapoh ka Jylla.
U President ka Meghalaya Pradesh Congress Committee (MPCC) bad MP ka Shillong ma Vincent H Pala, u dei uwei napdeng ki kyrtong bala ai jingmynjur da ka Pradesh Election Committee (PEC).
U ma Vincent un mih aireng pyrshah ia u MLA ka All India Trinamool Congress (AITC) ka Sutnga-Saipung ma Shitlang Pale, uba la jop ia ka elekshon MLA-2018 na ka ticket jong ka Congress.
Kane ka thup kyrteng ba nyngkong ka kynthup ruh ia 10 ngut ki MLA barim bad 7 ngut ki kyrtong Kynthei. Haduh 30 napdeng ki 40 ngut ki kyrtong ki dei ki riew thymmai, ki ban iakhun ia ka elekshon ha ka sien ba nyngkong eh.
Haba kren sha ki lad pathai khubor, u ma Vincent ula pyntip ba ki 40 ngut ki kyrtong ki kynthup ia 26 ngut na Ri-lum Khasi bad Jaintia bad 14 ngut ki dei na Ri-lum Garo.
“Ngin sa shong jingialang biang hadien shitaiew ban rai ia ki 20 tylli ki constituency ba dang sah ba kynthup ia 10 tylli ha Khasi Jaintia bad 10 tylli ha Ri-lum Garo” ula ong.
“Ngi dang shu pyllait tang ia ka thup hynrei ia ka kyrteng yn sa ai jingmynjur bad pynbna na Delhi” ula bynrap.
Haba pynpaw ba 20% na ki kyrtong ki dei ki kynthei, u ma Vincent ula ong “Nga sngew sarong ban pyntip sha phi ba ki don haduh 8 ngut ki kyrtong kynthei bad katto katne ngut ki dei kiba la nang la stad bha bad ba trei shitom. Ym tharai ba kin don kiwei ki seng sain pyrthei ban pynmih ia bun ngut ki kynthei (ha ka thup kyrteng jong ki”.
Une u President ka MPCC, uba dei ruh u Engineer, ula ong ba palat 6 ngut ki Engineer kin mih iakhun naka Congress ha kane ka kynti ba mynta nalor 8 ngut kiba la pyndep ia ka master bad Ph.D bad iwei i doktor.
Ki don haduh 6 ngut ki MDC ba mynta ha kane ka thup kyrteng bad kine ki dei u Bah Pynshngainlang N Syiem (Pynthorumkhrah), Bah Ronnie V Lyngdoh (Mylliem), Batskhem Ryntathiang (Mairang), Gabriel Wahlang (Nongstoin), Charles Marngar (Mawhati) bad Carnes Sohshang (Mawkyrwat).
U Bah Pynshngainlang bad Bah Ronnie ki dei kiba la long teng ki MLA ka Jylla.
Kiwei pat ki MLA barim ki dei u Dr Celestine Lyngdoh (Umsning), J Antonius Lyngdoh (North Shillong), Deborah Marak (Williamnagar), Billykid A Sangma (North Tura), Edmund S Sangma (Rangsakona), Sayeedullah Nongrum (Mahendraganj), Rophul S Marak (Rongara-Siju) bad Brigady Napak Marak (Bajengdoba).
Nalor ka Deborah, ki 7 ngut kiwei pat ki kyrtong kynthei ki dei i Kong Rona Khymdei (Nongpoh), Venetia Pearl Mawlong (South Shillong), Dr Banidashisha Kharkongor (Nongthymmai), Lakyntiew Sohkhlet (Sohra), Pynhunlang Nongrum (Mawkynrew), Victorealness Syiemlieh (Ranikor) bad Uttora G Sangma (Ampati).
Kane ka thup kyrteng ba nyngkong ka kynthup ruh ia u Champion R Sangma Pulit DSP ba kylla Chairman ka kynhun kaikhlaw ba shyrkhei ka Ri-lum Garo- ka Garo National Liberation Army (GNLA).
Kiwei pat ki kyrtong ki dei u ma Emlang Laloo (Nartiang), Nehemayah Tyngkan (Mokaiaw), Adrian Lambert Chyne Mylliem (Jirang), Marbud Dkhar (Mawlai), Manuel Badwar (East Shillong), Sardonik Nongkhlaw (Nongkrem), S Osborne Kharjana (Sohiong), Dannyson Kurbah (Mawphlang), Gopal Stone Hynniewta (Mawsynram), Nehru Suting (Pynursla), Goldenstar Nonglong (Rambrai-Jyrngam), Timjim K Momin (Mendipathar), Frederick Sangma (Raksamgre), Dr Kapin Ch Boro (Tikrikilla), Augustine D Marak (Dadenggre), Roger Benny A Sangma (Dalu), Karak R Sangma (Chokpot).
