Shillong, Nohprah 28 : U MLA ka Congress na Rambrai-Jyrngam Bah Kimfa S Marbaniang, hynne ka sngi ula aiti ia ka shithi iehnohkam kum u Nongmihkhmat, ban plie lynti ia ka jingleit pyniasoh sha ka National People’s Party (NPP).
Une u Nongmihkhmat paidbah ula buh ia ka shithi iehnohkam hakhmat u Lamphang ka Iingdorbar Thaw Ain ka Jylla hynne ka sngi Balang.
U Bah Kimfa u dei u MLA ba lai jong ka Congress napdeng ki 5 ngut, ki ba la iehnohkam bad kiban pyniasoh ialade sha ka NPP.
Ki arngut kiwei pat ki dei i MLA ka East Shillong Kong Ampareen Lyngdoh bad u MLA ka West Shillong Bah Mohendro Rapsang. Kine kila pyniasoh sha ka NPP dang ha ka taiew bala lah.
Ia u Bah Kimfa yn sa pdiang burom da u National President ka NPP bad Myntri Rangbah ka Jylla Conrad K Sangma ha ka jingialang ka ban long ha ka sngi palei ha Rambrai.
Sa arngut ki MLA ka Congress kin sa buh shen ia ka shithi iehnohkam kum ki Nongmihkhmat bad kine ki kynthup ia u MLA ka Mawlai Bah PT Sawkmie bad u MLA ka Nongpoh Bah Mayralborn Syiem. La ioh jingtip ba kine ki arngut ki MLA ki don jingthmu ban pyniasoh sha ka United Democratic Party (UDP).
