“Ngin aipor sa 15 sngi shuwa ban mih ka huri hura”: JAC
Nongpoh, Nailar 01: Ki Dkhot ka Joint Action Committee ka All Ri-Bhoi District Passenger Vehicles ha ka sngi Ba-ar, kila iatur paidbah dala ki jong ki kali kamai bad kerkut ia ka Ophis u Deputy Commissioner ka Ri-Bhoi, ban pynbor ia kane ka Ophis ba kan siew noh ia ka bai kali ba pyndonkam ban leit duty elekshon MLA-2023 bad kumjuh ruh jong ka Covid-19.
Ka JAC kala kerkut ia kane ka Ophis khlem da ailad shuh ia ki kali Sorkar ba kin rung shapoh ka Ophis ne ban mih. Ki Nongniah kali kamai kila iapyrta shla ruh hakhyrdop ka Ophis ba u Deputy Commissioner un pyllait noh mardor ia ka bai pyndonkam ia ka kali, kaba la sah mynta la palat 3-4 snem.
Kane ka jingiatur jong ki kali kamai kala wan jia hadien ka jingkut noh ka jingaipor ia u Deputy Commissioner ban pyllait noh ia ka pisa ba kot da ki phew lak tyngka kaba ka Sorkar ka dei ban siew ia ki kum ka bai bat ia ka kali ha ka ban pyndonkam ha ka por elekshon bad ha ka jingiakhun ia ka khlam Covid-19.
Ka phyllaw jong ka Ophis u Deputy Commissioner kala khapngiah da ki nongniah kali kamai bad ki kali kamai. La sakhi ba ki paidbah nongleit nongwan kila hap ban bat da ki kali shimet ne ap da ki kali tourist ba wan na Assam ban leit ban wan sha ka jaka baki thmu.
Na ka liang u Deputy Commissioner ula phah ia ki Magistrate ban iakren bad ka JAC hynrei ki Nongialam kila kyntait ban sngap haba dawa ia u Deputy Commissioner shimet ba un wan mih hi dalade ban kren bad ruh ban ai rai ha kaban pyllait noh mardor ia ka pisa jong ki.
Dei haba u DC ula leh ia kane ba ki kali kamai kila mih noh na kane ka phyllaw.
U Secretary ka JAC Bah Vincent Sohkhwai ula iathuh ba ka jingleit tur sha kane ka Ophis ka dei namar ka jingkuman ia ka jingdawa ban pyllait noh ia ka pisa bai kali, ia kaba ka jingaipor kala kut noh. Ula ong ba lada khein lang ia baroh ka bai kali jong ki nongniah kali kamai, ka bai kali ba pyndonkam da kane ka Ophis kala kot da ki phew lak tyngka.
“Ngi la wan ud wan nam la bunsien sha kane ka Ophis hynrei kane ka jingkyrpad jong ngi kam shym poi shano shano ruh haduh mynta mynne. Kumta ngim banse ban leit pynbor ia une u Khliehduh ka District” ong u Bah Vincent.
Kane ka jingjai jai jong ki Nongniah kali kamai kala wan hadien ba u Deputy Commissioner ula ai ka jingkular ba ka Ophis kan sa pyllait noh ia ka pisa bai leit duty Covid bad elekshon hapoh ka 15 sngi haba pyntip ruh ba ia mynta, ka Sorkar kam pat don pisa ban pyllait ia kane ka bai kali.
Halor kane, ki Nongialam kila pyntip ba ka JAC kan ap ia kane ka 15 sngi bad lada ka Sorkar kam pyllait satia ia ka pisa, ka JAC kan sa shim biang ia ki lad ba kham tyngeh haba ong ba lada mih kano kano ka jingjia ba sngewsh,ki bor pyniaid ka District ki dei ban shikm ia ka jingkitkhlieh.
Ha kane ka sngi, katto katne ngut ki nongshongdukan bam (food canteen) ruh kila iasnohkti lang bad ka JAC ki kali kamai namar ba ki ruh kim pat ioh satia ia ka pisa kaba ki dei ban ioh naka Sorkar Jylla kaba dei na ka bynta ka jingpynbiang bam ia ki briew Sorkar ha ka por elekshon.
