Shillong, Nailar 01: U samla Synshar Khymdeit hynne ka sngi ula pyntip ba ula dep ba ujor daka ejahar ha Mawlai Police Station halor ka jingshah pyndonkam ka kyrteng jong u ha ki briew kiba phah ia ka shithi dawa pisa ha ka kyrteng ka sengkieng atiar Hynniewtrep National Liberation Council (HNLC).
Lah ban kdew ba haki kyndiat sngi la saphriang kawei ka shithi dawa pisa na ki katto katne ki riew paidbah jong ka seng HNLC bala soi da u Synshar Khymdeit.
“Nga la ujor da ka ejahar ha Mawlai Police Station pyrshah ia kane ka jingshah pyndonkam ka kyrteng jong nga ban dawa pisa naki paidbah haka kyrteng jong ka HNLC” la ong u samla Synshar.
Haba kren sha ki lad pathai khubor u samla Synshar ula kubur ba um donkti ne don bynta satia ha kano kano ka jingdawa pisa haka kyrteng jong ka HNLC bad iaka kyrteng jong u la shu pyndonkam bakla da ki briew kiba kwah pynthohbria ia u, iaka ing ka sem bad iaka seng HNLC.
Haba kylli u samla Synshar ula ong ba ym tang bad ka seng HNLC hynrei um pat ju don bynta ruh wat bad ki kynhun sengbhalang bad kane ka jingpaw kyrteng ka dei tang ban pynjah burom iaka kyrteng bad iaka ing ka sem jong u.
“Watla ki don kiba kynnoh hynrei ma nga bad ka ing ka sem jong nga, ngim don jingiadei bad u nongialam barim ka sengkieng atiar ka HNLC u bah Juluis Dorphang uba dang don ha patok” ula ong.
Ula iathuh ba naka liang ki Pulit kila pynlong ka jingtohkit ban lap iaka jingshisha ba mano ba pyndonkam iaka kyrteng jong u ban dawa pisa naki paidbah haka kyrteng ka HNLC.
Naka liang ki bahaing jong u samla Synshar kila pynpaw ba u khun jong ki um pat ju don bynta ban dawa pisa bad um don bynta bad kano kano ka seng.
“Hadien ba la paw ka kyrteng jong u Synshar ba u dawa pisa haka kyrteng ka HNLC, ka jingim jong u ka don hapdeng ka jingma bad dei namar kane ngi kyntu iaki bor pulit ban pynlong ka jingtohkit ban lap iaki briew kiba la pyndonkam iaka kyrteng ban dawa pisa” la ong u hynmen.
Pule lang ia kane: Kynjah slam slam ka surok NH-44 ba pakhang surok ka KSU
