Shillong, Nailar 08: Ki shipai Indian Army jong ka kynhun Red Horn Division, kala poi hynne ka sngi nyngkong ha East Garo Hills District kum shibynta jong ka Freedom Ride-Trans Meghalaya Monsoon Odyssey bad ka leit jngoh ia ka jaka sahnam u Pa Togan ban pyndon burom ia une u riewshlur ka Ri-lum Garo .
Kane ka jingleit pyndon burom ia ki riewshlur ka Jylla ka dei shibynta jong ka “Azadi Ka Amrit Mohatsav” ban rakhe ia ka jingdap 75 snem ka jingioh laitluid ka Ri India.
Ia kane ka kynhun ba 12 ngut jong ki shipai Red Horns Division kiba la shang ia ka Jylla baroh kawei da ka thuk thuk, la pdiang sngewbha da u Superintendent of Police ka District Bruna A Sangma ha ryngkat bad u Additional Deputy Commossioner bad kiwei kiwei.
Kane ka Kynhun kala mih na Shillong naduh ka 7 tarik Nailar bad la lamkhmat ia ka da u Brigadier K.M Shende, Shaurya Chakra, Station Commander Umroi Military Station.
Kane ka kynhun niah thuk thuk ki shipai kala leit iuhkjat ha ka jaka sahnam u Pa Togan Nengminza kaba don ha Chisobibra bad pyndon burom ia u da kaba buh syntiew.
Kane ka kynhun kala ioh ruh bad iakren bad ki samla pule, ki dkhot ka NCC bad ki Heh Ophisar ha kane ka Pa Togan Nengminza Park hashuwa ba kin mih noh na ka District.
Kane ka kynhun kan leit mynta ban iuhkjat sa ha ki jaka ba tei ia ki motsah nam jong u Tirot Sing ha Nongkhlaw bad hadien jong u Woh Kiang Nongbah.
Ia kane ka Freedom Ride jong ka kynhun Red Horn Division yn sa pynhap lama ha ka 10 tarik Nailar ha Umroi da u Lat ka Jylla u Satya Pal Malik.
