Shillong, Nailar 08: U Nongialam bad MLA ka BJP Bah Alexander Laloo Hek, hynne ka sngi nyngkong ula pyntip ba u MLA ka TMC na Mawsynram Bah Himalaya M Shangpliang bad katto katne ngut ki MLA bad Nongialam seng sain pyrthei, kila pyni dak ia ka jingwan iasoh noh bad iakhun ia ka elekshon MLA 2023 na ka party BJP.
“Ki don katto katne ngut ki Nongialam bad ki MLA ba mynta bad kiba rim kynthup u MLA ka TMC na Mawsynram kila pyni dak ia ka jingkwah iasoh noh sha ka BJP bad ban mih aireng ha ka elekshon MLA ban wan naka BJP “ ong u Bah Hek haba iakren bad ki nongthoh khubor.
Hynrei ula ong pat ba ka jingiakren mynta ka dang iaid bad kam pat poi satia sha ka jingiamynjur lang.
“Ngi la dep iakren la katto katne sien bad ki katto katne ki MLA bad ruh ki MLA barim, hynrei kim pat ai satia ia ka rai kaba khatduh” ula ong.
“Ka jingiakren ka dang iaid mynta hynrei kila pyni dak ia ka jingkloi ban wan iasoh noh sha ka BJP bad ban mih iakhun ia ka elekshon na ka BJP “ ula bynrap.
