Shillong Naitung 08: U Myntri Rangbah ka jylla u Conrad K Sangma ryngkat ka jingdonlang u Chief Justice ka Meghalaya High Court u Sanjib Banerjee, u Myntri ka pule puthi u Rakkam Sangma bad ka Myntri ka tnad Ai ka Dr Ampareen Lyngdoh, hynne ka sngi Saitjain kila plie paidbah iaka Annex Building jongka Meghalaya High Court, Shillong.
Kane ka Building kaba thymmai kadei shi bynta jong ka jingpyniar iaka jingtreikam jong ka kashari bad latei ia katei ka building kaba thymmai haka jinglut jingsep kaba kot T.45 Klur kaba don iaka Auditorium, ki kamra na ka bynta ki nongiasaid aiñ bad kiwei ki kamra trei.
Kane ka jingtei kaba thymmai ka long kaba donkam bha bad kan ai jingkyrshan ia ka rukom treikam jong ka High Court.
Haba kren haka jingialang u Myntri Rnagbah ka jylla u Conrad K. Sangma ula ai jingiaroh ia ka jingshimkhia ban tei iaka kane ka building kaba thymmai bad ula banjur iaka jingdonkam ban don ia ki kashari kiba don ia baroh ki jingdonkam katkum ka juk kaba mynta ban pynthikna ba yn lah ban ai iaka jingbishar hok kaba sted.
U Myntri Rangbah ula iaroh iaka Meghalaya High Court ia ka jingbat skhem ia ka nongrim ha kaba iadei bad ka jingbym shah liang, ka jingkhuid jingsuba bad ka jingai ka jingbishar kaba hok ia baroh.
Ula pynpaw ruh ia ki jingthmu jong ka sorkar naka bynta ban kyntiew bad pynbiang ia ki jingdonkam ha ka jylla baroh kawei bad kaba bun eh ka jingbhah tyngka ha kine ki snem kiba la leit kadei ha ka liang ka pule puthi ban kyntiew bad pynbha iaka ki Lower Primary bad Upper Primary School jong ka sorkar bad kumjuh ban pynbiang ia ki jingdonkam ha ki jingpule ha ki kyrdan kiba heh.
Ula iathuh ba ka sorkar jylla kala pyniaid shakhmat naka bynta ban maramot, shna pynbha bad ban tei ia palat 2500 tylli ki LP & UP School ha ki snem ban wan.
Ka jingthmu jong katei ka sienjam ka long ban kyntiew iaka pule puthi bad ban pynbiang ia ki tiar ki tar katkum ka jingdonkam ki samla pule ha kylleng ka jylla
Meghalaya.Ka sorkar ka don iaka thong ban pynthikna ba man la ki khynnah pule kin ioh iaka lad ban pule ha ki jaka pule kiba paka kiba don ia ki jingdonkam baroh.
U Chief Justice ka Meghalaya High Court, u Sanjib Banerjee, ula pynpaw ba kane ka Annex Building kadei ka lynti kaba bha na ka bynta ban kyntiew iaka rukom treikam ka kashari ha baroh ki liang.
Ula pynpaw ruh ba ka long kaba kongsan ban don iaka jinglong jingman kaba biang naka bynta ki nongbishar, ki nongiasaid aiñ bad ki nongujor mukotduma ban pynthikna ba kan don ka jingsted ha kaban ai iaka jingbishar kaba hok.
Da ka jingdep tei iaka annex building, ka Meghalaya High Court ka thmu ban pynkhlain iaka jingkular ka jongka ban batskhem iaka hok jong ki paidbah.
Ka sorkar kala dep ban ai iaka jingbhah kum shi bynta ban kyrshan iaka jingtei ia ka annex building, kaba pyni ia ka jingkular ban don ka jingkhlain ha ka kam bishar synshar.
U Myntri Rangbah ula ai khublei ia baroh kiba don bynta ha kaban pyndep iaka jingtei iaka projek, kiba kynthup ia ki architect, engineer bad ka kynhun kaba tei iaka building.
