Tura Rymphang 24: U Myntri Rangbah ka Jylla u Conrad K. Sangma hynne ka sngi Saitjaiñ ula plie ia bun tylli ki Project ha Babadam, West Garo Hills ha kaba la iadonlang u Lamphang ka ïingdorbar thawaiñ ka jylla u Thomas A. Sangma bad u Myntri ka Tnad PHE u Marcuise Marak.
Ka Garo Hills Agro Food Park kadei ka sienjam jong ka All Garo Hills Multi Purpose Cooperative Society (AGHMPCS) kaba la ialam da u Fr. Sunny Mavelil bad kane ka park kadei kaba la bei tyngka baroh da ka sorkar jylla ha ka jinglut jingsep kaba kot T. 15.73 Klur kaba kynthup ia ka Mustard Processing Unit, Cashew Processing Unit, Hi-Tech Food Lab, Ginger Processing Unit, Solar Power Plant bad 25 tylli ki Cold Storage Unit.
Haba kren ha ka jingialang u Myntri Rangbah ula ong, “Ka sorkar jylla kala shimkhia ia ka mishon ka jongka ban kyrshan ia ki nongrep kiba donbynta ha ki kam rep kam riang. Ha ka jylla hi baroh kawei, ka sorkar kala pynshlur ban thung ia ki jingthung ki bapher bapher ban kan don ka jingiohnong, ban ai jinghikai ha kaban song bad ban pyniaid iew ia kitei ki marrep.
Ula iaroh iaka Cooperative Society kaba ialam da u Fr. Sunny ha kaban kyntiew iaka ioh ka kot bad ia ka kamai kajih ha ka thaiñ nongkyndong lyngba ka jingiatreilang bad ki nongrep bad ula ong ba ka sorkar kala shimkhia ban pynkup bor ia ki nongrep bad ki nongpynmih ha kaba yn ai jingkyrshan ia ki ba kin pynheh shuh shuh ia ka kam jongki.
Ia katei ka Agro Food Park kaba thymmai kan saiñ 100 MT ki marrep ha ka shi snem, kynthup ia ka mustard, cashew, ginger bad arecanut.
Haba kren halor ki sienjam kiba la shim da ka sorkar ban kyntiew arshah ia ka ioh ka kot jong ki nongrep ha ka jylla, u Conrad ula ong, “Ha ki 6 snem kiba la leit, 166 tylli ki Processing Unit, 154 tylli ki Warehousing bad 34 tylli ki Cold Storage la dep ban tei na ka bynta ban ai jingshakri ha ki thaiñ kiba don ha kyndong eh jong ka jylla”.
Ula ong, ba ka sorkar kala pynshlur bad kyntiew ia ki Integrated Village Cooperatives, Farmer Producer Organisation bad ki kynhun jong ki longkmie khnang ba kan don ka jingkylla ha ka ioh ka kot ha ka thaiñ nongkyndong.
“Ki don katto katne ki Processing Unit kidei kiba bha bad kiba dei ruh kiba bha tam hapoh ka thaiñ shatei lam mihngi” ula ong.
Ula ong ba la jan kumba T. 357 Klur la dep ban mang na ka bynta ban pynmih ia ki mar na ki marrep ha ka jylla.
“Ka sorkar kan pynkhlain ia kiba la don lypa bad kan bei tyngka na ka bynta ki kor ki bor kiba dang thymmai ban pynurlong ia ka thong ban kyntiew ar shah ia ka jingioh kamai jong ki 4.5 lak tylli ki longiing jong ki nongrep”.
Ula kyrmen skhem, ba ka Agro Food Park ha Babadam kala pyni ba kadei ka jaka kaba seisoh ia kaba dei ban pynbud ha kiwei kiwei ki bynta jong ka jylla bad ula ong, ba ka sorkar kan sa pynlong ia bun tylli ki jingai jinghikai bad ki jingialam jngoh ia ki nongrep khnang ba kin ioh ban ia sam ia ki jingtip bad ruh ban ioh jinghikai na kiwei pat.
U Myntri Rangbah ula plie ruh ia ka Arecanut Processing Unit bad buh mawnongrim na ka bynta ban tei ia ka P.A. Sangma Shopping Complex ha Babadam.
Ha katei ka jingialang la iadonlang u MLA u Arbinstone Marak bad u CEM ka GHADC u Albinush Marak.
