Guwahati, Rymphang 24: Ka Sorkar Assam kala ai jingmynjur ban ithuh noh iaka ktien Manipuri kum ka Associate Official Language ha ki 4 tylli ki district jong ka jylla Assam.
Ka kynhun Myntri kala ai ia ka jingmynjur ia ka Assam Official Language (Amendment) Bill, 2024 kaban kynthup ban pynrung lang noh ia ka ktien Manipuri kum ka Associate Official Language ha Cachar, Karimganj, Hailakandi bad Hojai District jongka Barak valley.
Lyngba katei ka Bill la thmu ruh ban wanrah ia ka jingpynkylla ia ka Assam Official Languages Act, 1960 da kaba pynrung noh ia ka kyndon 5B kaba thymmai.
U Myntri Rangbah ka Assam u Himanta Biswa Sarma ula ong, ba la shim ia katei ka rai na ka bynta ban iada ban pynneh pynsah bad ban kyntiew iaka kolshor, ka imlang sahlang bad iaka jinglong tynrai ka ktien ka thylliej jong ki jaidbynriew Manipuri kiba shong ba sah hapoh ka jylla Assam.
