Guwahati, Rymphang 24: U Nongialam ka Liang Pyrshah jong ka ïingdorbar thawaiñ ka Assam, u Debabrata Saikia ula aiti ia ka shithi jingujor ha u Lamphang ka ïingdorbar ban dawa mait kyrteng noh ia ki 2 ngut ki MLA ka seng Congress.
U Debabrata ula kyntu ia u Lamphang u Biswajit Daimary ban mait kyrteng noh ia ki 2 ngut ki MLA ka Congress kiba kynthup ia u Kamalakhya Dey Purkayastha bad Basanta Das hadien ba kila pynbna ba kila ai jingkyrshan ia ka sorkar Assam kaba la ialam da ka BJP khlem da mih noh na ka seng.
Haba ialam ia ka kynhun jong ka seng Congress u Debabrata ula aiti artylli ki shithi jingujor sha u Biswajit Daimary bad kyntu ba udei ban tuklar mardor ha kaban mait kyrteng ia kitei ki 2 ngut ki MLA kum ki dkhot jong ka ïing dorbar thawaiñ ka Assam.
Kitei baroh 2 ngut ki MLA kila shah weng shipor hadien ba kim shym la ai jingpynshai ia ka Show Cause Notice kaba kila ioh pdiang, hadien ba kila pynbna paidbah ba kila ai jingkyrshan iaka sorkar BJP ha Assam.
