Shillong Kyllalyngkot 21: Ha jingrakhe ia ka jingdap 52 snem jong ka jylla Meghalaya, hynne ka sngi u Blei, u Lat ka jylla u Phagu Chauhan ula plie ia ‘Ki Mawbynna” ne Monoliths kiba la tei hakhmat jong ka khyrdop jongka Raj Bhavan, Shillong kaba long ruh ka jingdap 150 snem jong ka Raj Bhavan.
Ha kane ka sngi, u Lat ula plie ruh iaka Tree House kaba la tei ha Raj Bhavan, kaba la nang pynitynnad shuh shuh ia kane ka jaka, ha kaba la iadonlang ki officer bad ki nongtrei jong ka Raj Bhavan hapoh ka jingialam u Commissioner and Secretary jong u Lat, u Dr. B D R Tiwari.
La tip mynshwa ia ka Raj Bhavan kum ka Government House bad kala long kawei napdeng ki iing kiba la tei nyngkong eh hapoh Shillong bad katei ka iing kadei kaba shong ba sah ki Deputy Commissioner, Colonel Henry Stuart Bivar bad la tei ia ka kum ka jingpyninam ia ka jingsynshar ki phareng.
Ha u snem 1874, haba ka Shillong kala long ka Headquarters jong ka jylla kaba dang shu thaw thymmai ka Assam, la pynkylla noh ia ka Bivar House sha ka Chief Commissioner Residency.
Kane ka Residency, kala shah pynjulor noh ha u jumai ha u snem 1897 ia kaba ym shim la lah shuh ban maramot ne ban shna pynbha.
Kumta la tei ia ka iing kaba thymmai halor jong katei ka Residency ha u snem 1903-04 bad ha ka 6 tarik u Nohprah 1951 la pynkylla kyrteng noh ia kane ka Government House sha ka “Raj Bhavan”.
Hadien ba ka ri India kala ioh iaka jinglaitluid, katei ka shap jong ka jingsynshar ki phareng kala kylla noh kum ka shap jong ka riti synshar paidbah ka ri bad naduh katei ka por kala kylla long ka jaka sah jong ki Lat ka jylla Meghalaya.
