Shillong, K’lyngkot 21: Ka 5TH Meghalaya Games 2024 kaba la long ha ka District jong ka West Garo Hills Tura kala poi noh sha kaba kut haka sngi Saitjaiñ, hynrei ban sngewthuh khambha ia ka jinglong jingman haka rukom pyniaid ia kane ka lympung iakob ialehkai, u Myntri ka kam ialehka Bah Shakliar Warjri ula leit iakynduh bad iakren markhmat bad ki nongialehkai kiba wan na kylleng ki district ban iashimbynta ha kane ka lympung.
Kane ka jingiakynduh u Myntri ia ki nongiashimbynta ka long ban lap ia ki jingduna ne ki jingbym biang ha ka jingpyniaid ia ka Meghalaya Games khamtam ha kaba iadei bad ka jingpynbiang ia ka bam kumba la mih ki jingkynnoh ha ki Social Media.
U Bah Shakliar ula ong ba ka tnad sorkar kala pyntikna ban ai ia kaba bha tam ia baroh sha baroh ki nongialehkai hynrei ha ka sngi sdang jong ka Meghalaya Games kala don ka jingduna ha kaba ki khynnah kila ioh bamja sngi da la kut ka por bad kane kala mih namar ka jingwan ka President bad la khanglut ia ki lynti iaid baroh bad kumta ka bam kala wan poi slem bad haka sngi kaba bud ula ai ka jingbthah sha baroh ki nongpyniaid ba kidei ban pyntikna ba kum kane ka jingjia kam dei ban jia shuh.
Ha kawei pat ka liang ki nongialehkai kila pynpaw ia ka jingkmen ia ka jingpynbiang jong ka sorkar ym tang ia ka bam bad ka jaka sah hynrei ia ka jingkloi ki briew na rilum Garo ban iarap ha baroh ki liang haba ki donkam bad kila kyntu ruh iaka sorkar ba kan bteng ban pynlong ia kum kine ki lympung iakob ialehkai khnang ba kin ioh ia ka lad ban pyni ia la ki sap ki phong.
