Shillong , Kyllalyngkot 21: Ka KSU Nongthymmai Circle kala pynkup burom ia ki samla pule kiba la wan shakhmat bha ha ki kyrdan pule bapher bapher da U Soso Tham Academic Award 2022-23 kaba la pynlong ha ka sngi Saitjaiñ ha Herman Hall jong ka Parish Nongthymmai.
U General Secretary ka KSU u samla Donald V. Thabah kum u kongsan ha ka jingialang ula kyntu ia ki samla pule ba kin dang iai trei shitom shuh shuh khnang ba kin dang lah ban kiew ha ka jingim jongki bad ban long ruh ka jingmyntoi ia ka shnong ka thaw bad ka Jaidbynriew.
Ha kane ka sngi la iadonlang u Syiem ka Hima Mylliem u Paiem Ainam Manik Syiem kum u Symbud Kongsan, u Samla Iashan Mukhim u Assistant Finance Secretary ka KSU, u samla Melajied Khongbuh Assistant Information & Publicity Secretary ka KSU ki Rangbah/Secretary Shnong bad ki nongkitkam jong ki Seng Kynthei bad Seng Samla jong ki shnong kiba hap hapoh ka jylli treikam jong ka KSU Nongthymmai Circle.
Ïa ka jingialang pynkup burom la pyniaid da u samla Richard Mawkhiew u Vice President ka KSU Nongthymmai Circle ha kaba la ioh iaka jingkren na u President barim ka KSU Nongthymmai circle u samla Fred Kharmawphlang, u Secretary ka Synjuk ki Nongshynshar Shnong Nongthymmai Pyllun Bah Eddie War, i Longkmie ba ialamkhmat ia ka KWAADA i kong Nevi Rapthap bad la pyniphuh iphieng ia kane ka sngi da ki jingrwai bad ki jingshad Tynrai.
Ha kane ka juh ka sngi ka KSU Nongthymmai Circle ka la pynkup burom iaki rang ki thei ialehkai kiba la wanrah nam ia ka Jaidbynriew.
