Shillong, Nailar 05: U Myntri Rangbah ka Jylla Conrad Kongkal Sangma hynne ka sngi thohdieng, ula plie ia ka Science Block ba thymmai (jingtei ba thymmai jong ka tnad pule Science) ka Thomas Jones Synod College kum shibynta ban rakhe ia ka jingdap 25 snem jong kane ka jaka pule kaba don ha Jowai.
Joined by Education Minister @LahkmenR, Hon’ble MLA @WailadmikiS & Principal of Thomas Jones Synod College, we inaugurated the Science Block of the College funded under @Meghalaya_RUSA
May this added infrastructure be a blessing to our students. @dpradhanbjp pic.twitter.com/u2oKPG3rQi
— Conrad Sangma (@SangmaConrad) August 5, 2022
Kane ka jingtei ka dei kaba la bei pisa da ka Sorkar Pdeng lyngba ka skhim Rashtriya Uchchatar Shiksha Abhiyan (RUSA).
Haba kren ha ka jingialang ban rakhe ia ka jingdap 25 snem, u Myntri Rangbah ula ong ba ki samla ki dei ki spah bah ba kongsan tam jong ka Jylla bad ka Sorkar kala shim ia ka lynti ban pynleit jingmut bha ha ka ban pyniajan bad ki samla khnang ba kan lah ban kyntiew bad pynkupbor ia ki ha baroh ki liang.
“Nga khot ia ki samla kum ka bor ka jong ngi bad ka dei ka kamram jong ka imlang sahlang, ka Sorkar Jylla ban thaw ia ki lad ki lynti kiba dei bad ban pyni lynti ia ki samla ha ka lynti kaba dei” ula ong.
Haba pynpaw ba ki samla ka Jylla ki dei kiba don naduh ba kha ia ka sap, u Myntri Rangbah ula ong ba kane ka Sorkar ha kine ki saw snem bala leit noh, kala wanrah ia shibun bun ki programme ban kyntiew ia ki samla bad ruh ia ki sienjam ha ki bynta bapher bapher naduh ka pule ka dangle, ka sengkam sengjam, ka put ka tem, ka jingialehkai ban pyntbit ia ki ba kin lah ban iakotbor bad ai ruh ka rynsan ba kin paw hala ki jong ki sap ba ki don.
Ha kane ka jingialang, u Myntri Rangbah ula shim ia ka por ban pyntip ba ka Sorkar Jylla kala mang ia kiba bun ki kam pynroi ban kyntiew bad pynitynnad ia ki jingtei kiba don ha sor Jowai kynthup ka jingshna ia ka Mini Secretariat.
Kiba la iadonlang ha kane ka sngi ki kynthup ia u Myntri ka tnad Pule Puthi ma Lahkmen Rymbui bad u MLA ka Jowai ma Wailadmiki Shylla.
