Shillong, Nailar 05: Ki Self Help Group (SHG) na kylleng ki jaka jong ka Jylla, kila lam lynti sha ka Har Ghar Tiranga Campaign, da kaba suh ia ki lama lai rong ka ri, ki ban pynher ha ki thliew Iing naduh ka 13 tarik Nailar haduh ka 15 tarik Nailar.
Ki SHG na manla ki District ka Jylla kila bunkam mynta ban shna ia ki lama lai rong ka Ri ban ai jingkyrshan ia kane ka campaign kaba la pynlong kum shibynta jong ka Azadi Ka Amrit Mohatsav.
Ka Sorkar Meghalaya ha ryngkat bad ka Ri baroh kawei, kala pynlong ia ka “Har Ghar Tiranga” Campaign ne ka jingpynher lama lai rong ban rakhe ia ka jingdap 75 snem ka jingioh laitluid jong ka Ri India.
Ka jingthmu jong kane ka campaign ka long eh na ka bynta ban pynshlur ia ki paidbah ba kin pynher ia ki lama lai rong ha manla ki thliew Iing naduh ka 13 tarik haduh ka 15 tarik Nailar 2022, ban pynrhem ia ka mynsiem ieid ri ha ki paidbah bad ruh ban pynsngewthuh ia ka jingmut jong ka Lama ka Ri India.
