Shillong, Nailar 05: U Myntri ka Tnad Community & Rural Development (C&RD) ka Jylla Bah Hamletson Dohling u pyntip ba ka jingdon jong ki Self Help Group (SHG) ka Jylla kala kiew na ka 6000 tylli hashuwa u snem 2018 sha ka 45000 tylli ha kine ki saw snem tam bala leit noh.
U Myntri ula pyntip ia kane haba kren ha ka SHG Mela ba nyngkong eh jong ka Mylliem Block, kaba long hynne ka sngi thohdieng ha Umlyngka, Upper Shillong.
“Ha u snem 2018, ki don tang 6000 tylli ki SHG ha Jylla hynrei mynta kila don palat ia ka 45000 tylli ki SHG kiba treikam ha ka Jylla baroh kawei” ong u Myntri uba la iaroh ia ki kynhun jong ki Kynthei bad Longkmie kiba la mih shakhmat ban thaw ia kine ki SHG.
U Myntri ula buh ka jingkyntu ia ki SHG ba kin pynsaphriang lem ia ka khubor sha kiwei pat ki kynthei bad longkmie khnang ban lah kynjoh ia ka jingiadonbynta jong kiba bun tam hapoh ka Mylliem Block.
Haba sngewnguh ia ka MRSLS bad ka NRLM kaba la trei shitom ban leit rung ha manla ki shnong ban pynsngewthuh ia ki paidbah halor ki jingmyntoi ba lah ban ioh na ki SHG, u Myntri ula ban jur “Ki SHG ki dei ban da buh da ka kyndon ban lah kynjoh ia ka thong naba ka jingbuh ia ka thong kan pynlong ia ki SHG ban treikam bha hapdeng jong ki, ka ban lam pat sha ka jingpynmih ia ki mar kiba kynsai bad kiba janai”.
Ha kane ka sngi, u Myntri uba dei u kongsan bad u symbud kongsan Bah Lambor Malngiang MLA ka Nongkrem, kila sam ia ki kor Computer sha ki 9 tylli ki VEC, ka jingsam ia ki Cheque hapoh ka FOCUS sha ki 106 tylli ki kynhun nongrep bad ki sanction letter sha ki 100 tylli ki SHG.
Kiwei pat kiba la iadonlang ha kane ka mela ki kynthup ia u Bah D Hynniewta, Project Director, DRDA, East Khasi Hills, BahP T Passah, BDO, Mylliem Block bad kiwei kiwei.
