Shillong, Risaw 15: U Myntri Rangbah ka Jylla u Conrad K. Sangma, hynne ka sngi Palei ula plie paitbah ïa ka jingrakhe dap shispah snem jong ka Rilbong, kaba dei kawei na ki jaka ba don histori ha ka nongbah Shillong, ban rakhe ïa ka jingdap 100 snem jong ka shnong Rilbong, ka Rilbong Durga Puja bad ka Rilbong Sanatan Hindu Dharma Sabha.
Ha kane ka prokram la iadonlang u Myntri ka tnat Arts and Culture uba long ruh u MLA ka thaiñ u Bah Sanbor Shullai, ki nongïalam shnong bad kiwei kiwei ban rakhe ia ka jingshanam ka Rilbong kaba don ia ki kolshor kiba bunjait, ka jingïashongsuk jongki jaitbynriew bapher bapher bad ka jingai jingshakri ia ki paidbah.
Haba kren ha ka jingïalang, u Sangma ula ai jingïaroh ïa ki nongshong shnong kiba la pynneh pynsah ïa ka jinglong kyrpang jong ka Rilbong bad ka pynpaw ruh ïa ka jingnoh synñiang jong ki riewshimet na ki jaitbynriew bapher bapher ia ka roi ka par jongka imlang sahlang, ka kolshor bad ki kam pynroi ha ki jaka treikam ki bapher bapher.
Ha kaba iadei bad ka jingpynkup burom ïa ki 25 ngut ki riewpawkhmat kiba la khlad noh, da kaba ai ia ka khusnam Trailblazers Awards, u Myntri Rangbah ula ai burom ïa kine ki riewpawkhmat kiba la pynwandur ia ka jingim jong ki paitbah ha ki spah snem kaba la dep.
“Kine ki briew kiba kyrpang kila don ha ki por kiba eh bad jynjar bha, hynrei kawei ka jinglong kaba ïasyriem hapdeng jongki, kadei ba kim shym la kynrandien hynrei kila iaid shakhmat ha kaban kynjoh ia ka thong kaba ki angnud” ula ong.
U Sangma ula pynpaw ïa ka jingsngewnguh ïa ki bahaïing hasem jong kitei ki riewpawkhmat kiba la shah pynkup burom bad ka banjur ba dei ban pynneh pynsah ia ka jingdonnam ka jongki bad ruh ban batskhem ia ka nongrim ka jongki.
Ia kine ki nongioh khusnam la jied da ka Advisory Panel kaba la khlieh da u Chief Secretary barim ka jylla u Bah D.P. Wahlang, ha ki liang ki bapher bapher kaba kynthup naduh ka thoh ka tar, ka kam saiñ pyrthei, ka pule puthi, ka koit ka khiah, ka kolshor bad ka jingai jingshakri ia ki paitbah.
Kine ki 25 ngut ki kynthup ia u myllung Soso Tham, u Rev. J.J.M. Nichols Roy, Babu Jeebon Roy, Dr. Bidhan Chandra Roy, Mavis Dunn Lyngdoh, Neil Nongkynrih, Khan Saheb Amjad Ali, Ardhendu Chaudhuri, Bibhu Bhushan Chaudhuri, Sudhindra Bhushan Chaudhuri, Jyotindra Nath Chaudhuri, Saradamanjori Datta, Dr. Basudeb Datta Roy, Dr. Pulin Behari Deb, Dr. Bidhu Bhusan Dutta, Rai Saheeb Shivnath Dutta, Primrose Garfield Gatphoh, Jeewan Ram Goenka, Hopewell Elias Khariong, Brington Buhai Lyngdoh, Dr. Homiwell Lyngdoh, Babu Wilson Reade, E.N. Shullai, Ratanlal Singhania bad u Col. Puran Bahadur Thapa.
Kine ki bahaïing hasem kila wan naduh na ri United States, na Delhi, Kolkata, Dibrugarh bad kiwei kiwei ki jaka, ban shimti ïa ka khusnam bad ia ka burom na ka bynta kitei ki riewpawkhmat kiba la khlad noh.
Kum shi bynta jong ka jingkyrshan ka sorkar ia ki kam pynroi ha ki shnong ki thaw bad ka jingpynneh ia ki jingdon jingem kiba naduh hyndai hynthai, u Sangma ula iati ïa ka Sanction Letter kaba T.25 lak na ka Chief Minister’s Special Development Fund (CMSDF) sha ka Rilbong Sanatan Hindu Dharma Sabha.
U Myntri Rangbah ula ong, ka Sorkar ka ai jingïarap ïa ki kam pynroi ia ki shnong lyngba ki Dorbar Shnong, ki Committee jong ki shnong ryngkat bad ka jingpyniar ia ki prokram pynroi sor.
Ula bynrap ba ki jingdon ia ki jingtei kiba iadei bad ki kolshor bad ki jingtei kiba naduh ki por hyndai hynthai kila ioh pdiang ia ki jingkyrshan lyngba ka Tnad Arts and Culture, Tourism, North Eastern Council bad na ka CMSDF.
Ka shnong Rilbong, kadei kaba don hajan ka Wah Umshyrpi bad kadei ruh ka jaka ka don ïa ka jingïadei kaba kyrpang ha ka histori jong ka thoh ka tar ha ka nongbah Shillong. U nongthoh pawnam tam ka ri uba la ioh pdiang ia ka Nobel Prize u Rabindranath Tagore ula sah ha Jitbhumi, Rilbong ha u snem 1923 ha ka jingwan jngoh ia ka Shillong. Ka jingïadei ka jongu bad ka rilum Khasi Hills kala iasoh lyngba ki kam ki jongu kiba kynthup ïa ki bynta jong ka drama Raktakarabi (Red Oleanders).
La seng ia ka shnong Rilbong ha ki snem 1920, ha ka por ba ka Shillong ka dang long ka nongbah jong ka Assam hapoh ka jingsynshar jong ka Sorkar Phareng. Ka Rilbong kala roi bad kylla long ka jaka sah ki paitbah na ki jaitbynriew bapher bapher, kiba kynthup ia ki Khasi, Bengali, Assamese, Nepali bad Marwari bad kine kila im lang da ka jingsuk bad ka jingïatylli.
