Shillong, Jylliew 12 : Ka Sonam Raghuvanshi kala phla ba ka iadon bynta ha ka jingiasuhbuit hynrei kala kynnoh ia u baied Raj Kushwaha ba u dei uba suhbuit nyngkong eh ha lyndet ka jingpyniap ia u kurim jongka, u Raja Raghuvanshi ha ka jingwan leh honeymoon ha Sohra.
“Hooid, ka (Sonam) la phla ba ka don bynta ha ka jingiasuhbuit hynrei ka jingkylli ba mano ba suhbuit nyngkong eh ka dei kaba donkam ban hap pynshisha naba ka (Sonam) la kynnoh ia u Raj katba u Raj ula kynnoh ia ka Sonam” ong u DIG (Eastern Range) Davis NR Marak ha ka sngew Palei haba sam ia ki jingtip halor ka jingiaid ka jingtohkit pyrshah ia ka Sonam, Raj bad ki 3 ngut ki snar nongpyniap-Akash Rajpur, Vishal Singh Chauhan bad u Anand Kurmi- da ka kynhun Special Investigation Team (SIT) hadien ba la aibor 8 sngi ka Iingkashari ban tohkit.
Kat kum ka jingong jong u, ka Sonam bad u Raj ki dei ki nongshah suba ba hakhmat eh namar ka jingsuba ba ki don ka jingiadei.
“Haduh mynta ki nongshah suba ba hakhmat eh. Hynrei, mano ba dei ki nongsuhbuit nyngkng eh, mano ba pyrkhat nyngkong eh ia kane ka kam, kane ka dang donkam ban hap pynthikna ia mynta” ula ong.
La ka Sonam kala kular ban siew T.20 lak sha kine ki laingut ki nongpyniap briew, u Marak ula ong “Kane ka dang don ha ka jingtohkit bad kane ka dei kaba ngi kynnoh ia kine ki nongshah suba mynta…kumta ngam pat lah ban batai eiei halor kane ka bynta”.
La ka Sonam kala siew teng ia ka pisa, ula ong “Ia kane ngin dang pynthikna lyngba ka jingtohkit bad haba pynshong nongrim ia ki jingbatai jongi, ngin sa pynshisha ia kaei kaba ka ong bad hadien kane ngin sa lah ban ong katno lane ha kano ka rukom la pyniaid iaka jingsiew pisa”.
U Marak u iathuh ruh ba ha ka jingtohkit, ka Sonam kala kyntait ba ka pduh ia u Raja da ka tiar pyniap (wait) bad na ki jingbatai jong ki nongshah kynnoh, la paw ba dei kine ki lai ngut kiba pyniap ia u Raja (ha ka 23 tarik Jymmang), ia kaba kila pynthikna ba kila leh ha Wei Sawdong, ka jaka kaba lap ia ka metiap bala kem pyut jong u Raja myn ha ka 2 tarik Jylliew.
Ula pynthikna ruh ba ka Sonam kala iarap ia kine ki laingut ban iarah ia ka metiap u Raja bad ban bret shapoh ka riat ha Wei Sawdong.
“Hooid, ka jingbatai jong kine ki nongshah kynnoh, ki nongpyniap, ka pyni ba ka Sonam kala iarap ha kaban bret ia ka met u Raja hadien bala dep pyniap..kala iarap ban rah ia ka met bad bret shapoh ka riat”.
Haba kylli, u DGP ula pyntip ba ia kine ki nongshah kynnoh baroh, yn sa ialam sha Sohra ban pynwandur biang ia kane ka kam bymman hadien bala dep ka jingtohkit.
La kine ki runar kila leit swait lypa ia ka Wei Sawdong shuwa ban pyndep ia kane ka kam pyniap, u Marak ula ong “Ia mynta hi, ki nongshah kynnoh kila kyntait hynrei ngim pat lah ban batai bad kine ki kam ki hap hapoh ka jingtohkit”.
Ia kawei pat ka jingkylli la ki Pulit kin pan jingmut na Iingkashari ban pyndonkam ia ki lying detector ( kor ba kem ia ki jingkren thok) ha ka jingtohkit pyrshah ia kine ki nongshah kynnoh, u DIG ula ong “Nyngkong eh hadien ba kila ai ia ki jingbatai, ngi hap ban pynshisha ia ka. Lada ki ong ba ngi la leh ia kane lane ngi la leit sha kata kata ka jaka, ngi hap ban leit pynshisha hi dalade la kine ki jingbatai ki iahap ne em-kane ngin hap leit hi dalade bad pynshisha ia ki jingbatai jong ki”.
Une u Heh Pulit u pyntip ba ki Pulit ka Jylla kin pan jingiarap ruh na ki Pulit ka Guwahati bad na kiwei ki Jylla lada donkam ia ka jingiarap jong ki.
Nalor kane, u Marak u iathuh ba ia mynta, ki briew kiba iadonkti ha ka jingpyniap ia u Raja kila shah kem lut. “Lada dang don kiba donkti, ngin sa lap hapdeng ka jingiaid jong ka jingtohkit” ula bynrap.
Ka jingtohkit ka lap ba lai tylli ki scooty la shim wai na Shillong-ka Scooty ba pyndonkam ka Sonam bad u Raja la pynieng ha Sohra Rim bad la ioh kurup da ki Pulit.
Ki Pulit ki dang tohkit haba iadei bad ki artylli kiwei pat ki scooty bala pyndonkam da kine ki laingut ki nongpyniap briew.
“Hadien ba dep pyniap, la i kumba shiteng lynti, kala leit lang bad kine ki laingut ki runar haduh Mawkdok bad nangne kine ki laingut kila iaid noh shakhmat bad ka Sonam kala leit sha Guwahati bad hadien kane sha Indore” ong u Marak.
