Shillong, Jylliew 12 : U Symbud Myntri Rangbah Bah Prestone Tynsong ha ka sngi Palei, ula kular ban sa khmih ia ka jingdawa ban kyntiew kyrdan noh ia ka Mawrong Sub-Centre sha ka Primary Health Centre (PHC).
Ia kane la pyntip da u MLA ka NPP na Mawhati Bah Charles Marngar, uba la ialam ia ka kynhun ka Synjuk ki Nongialam Shnong, Mawrong Road, Ri-Bhoi District-kaba dei ka synjuk ki Rangbah Shnong na ki shnong ka thain Mawrong, hadien ba dep aiti ia ka shithi pynkynmaw ia u DyCM halor kane ka kam.
Haba iakren bad ki nongthoh khubor, u Bah Charles ula ong “Ka jinghngai hapdeng ka Umsning CHC bad ka shnong Mawrong ka long kumba 17 Km. Kane ka dei ka jingeh kaba khraw bala mad da ki paidbah khamtam ia ki longkmie kiba armet”.
“Nga kmen eh mynta ka sngi ba ngi ioh ia ka jubab kaba sngewtynnad na u DyCM bad ngi kyrmen ba un sa shim mardor ia ki sienjam ban kyntiew kyrdan noh ia ka Mawrong Sub Centre sha ka PHC” ula bynrap.
Kat kum ka jingong jong u, ka Shnong Mawrong kala mynjur ban ai ia ka jaka na ka bynta kane ka jing kyntiew kyrdan.
Ha ka shithi, ka Synjuk kala pynpaw ia ka jingsngewnguh ba u Bah Prestone ula iakren ia kane ka kam lyngba ka shithi ba 3 tarik Jymmang 2024 bad 2 tarik Iaiong, 2018.
“Wat hapdeng kane, ka Tnad ka Koit ka Khiah kam pat shim satia ia kano kano ka sienjam halor ka jingtyrwa kyntiew kyrdan. Kane ka jingbym leh eiei ka dang bteng ban ktah ia ki hajar ngut ki nong shongshnong kiba shaniah tylli ha kane ka jaka sumar ka ba dang don hapdeng shibun ki jingduna ban ai ia ka jingsumar kat kum ka jingdonkam u paidbah” kila ong.
“Ngi kwah ruh ban ban jur ba nalor ki jingtei kiba donkam, ka jingbuh ia ki nongsumar kiba don ka kyrdan kynthup ki doktor, ki nos bad ki nongtrei-ka long kaba kongsan na ka bynta ka jinglah treikam bha jong kane ka jaka sumar. Khlem ki nongtrei kiba biang, ka jingthmu ban kyntiew kyrdan kan iai neh kum ka kam ka bym pat urlong” ban jur ka Synjuk.
.){kind=link}