Shillong, Iaiong 14 : U Myntri Rangbah ka Jylla Conrad K Sangma ha ka sngi Ba-ar, ula pynbna ba ka Sorkar Jylla kala rai ban pynlong ia ka project wadbniah kaba bniah bha ban wadbniah ia ka tynrai jong ka Jaidbynriew Khasi-Jaintia bad ki Garo.
“Ngi la buh ia artylli ki Committee, kawei ka ban khmih thik tang jong ka Jaidbynriew Khasi-Jaintia bad kawei pat ka ban khmih ia jong ka Jaidbynriew Garo” ong u Conrad hadien ha dep pyniaid ia bun tylli ki jingialang ha Tara Ghar State Guest House.
Kine ki project wadbniah kin kynthup ia ka DNA mapping (jingwad tynrai na ka snam), ka ktien ka thylliej bad ka jingiadei ha ka riti dustur, bad ka jingiatreilang bad ki nongwad bniah ba kin buh jingthoh ia ki bynta bapher bapher jong kine ki Jaidbynriew.
“Ngi leh ia kane namar ngi kwah ban iohi ia ki jingthoh ba kham bun shaphang ki Jaidbynriew, ki jingwad bniah ba kham bun bad ki jingshisha kiba kham bun, kin long kiba lah ban ioh” ong u Conrad.
Kane ka project la khmih lynti kan shimpor hapdeng 18-24 bnai ban dep, da kaba pynmih ia ka kaiphod man ka por katba nang iaid ka jingwadbniah.
“Ngin sa pynlait ia kane ka research program ha u bnai Jymmang” bynrap u Conrad haba pyntip ba ka jingwad bniah ba nyngkong kala iaid bad ka kynhun kala trei ia kane ka project naduh u bnai Rymphang.
Ka jingwad bniah kan kynthup ia ki jingiasyllok bad ki jaka pule hapoh ka ri bad bar ri ba kin pynlong ia ka jingbishar ba bniah ia ka tynrai jong ki jaidbynriew riewlum ka Jylla.
