Shillong, Naitung 13 : Ki nongkyrshan ba radbah jong u Bah HM Shangpliang, MLA ka Mawsynram ki la pynpaw ba ki kham noh ka mon ban leit sha ka BJP ban ia kaba neh ha ka All India Trinamool Congress.
U Bah HM Shangpliang udei u wei na ki 12 ngut ki MLA ka Congress kiba phet noh na ka party ban leit pyniasoh noh sha ka AITC ha kine ki khyndiat bnai ba la dep.
Hynrei tang hadien katto katne, ki nongialam jong utei u MLA ki la pynpaw ba kin shem jingeh bha ha ka elekshon ban wan ha katei ka constituency lada u MLA u dang iai neh ha ka Trinamool Congress.
“Ha ka jingialang jong ki para nongialam kaba la dep dang shen ha Mawsynram, ngi la rai ban pynsngew ha u MLA ba kan bha ba ngin don noh ha kawei pat ka party kaba baroh ki paidbah nongthep vote ki mon lang khnang ba ha ka elekshon ban wan ngin ioh biang ia ka jingjop,” ong ki nongialam ba hakhkmat jong utei u MLA .
Ym tang katta, ki la iathuh ruh ba namar ba katei ka constituency kadei kaba don ha khappud ha kaba ki don bun kiwei pat ki jaidbynriew kiba dei ki nongthep vote, kumta ki sngew ba ka kham lah ka National Party kaba mut lait noh na ka Congress bad NPP dei sa tang ka BJP.
“Haduh mynta ngi dang ap sa kaei kaba na ka liang u MLA pat u don ban ong ne pynpaw la u kyntait ne pdiang ia ka jingai jingmut jong ki,” ki la ong da kaba pynpaw ia ka jingkyrmen ba khlem pep u MLA un burom ia ka jingai jingmut jong ki.
Katkum ka jingiathuh jong ki, shen kin sa lum biang ia ka jingialang na ka bynta ban shim ia ka rai kaba khatduh ryngkat bad u MLA. La sngewthuh ruh ba lada na ka liang u MLA um kwah ban leit sha ka BJP ha kaba khatduh ki lah ban aireng kum u kyrtong shimet.
