Shillong, Naitung 21: U Nongialam ka BJP bad u MLA ka Pynthorumkhrah Bah AL Hek ha ka sngi Baar, ula ong ba ka Sorkar Pdeng ka dei ban pynlong ia ka jingtohkit kaba bniah halor ka jingpynlong ka Cockroach Janata Party ia ka jingiakhih, hashwa ban shim ia kano kano ka rai kaba khatduh halor ka jingdawa ba u Myntri Sorkar Pdeng udei ban hiar shuki noh lane yn pyndonkam da ka bor.
Haba kylli ia ka jingsngew ka jongu halor ka jingiakhih kaba la pynlong da ka “Cockroach Janata Party” bad hato ka seng ka kyrshan ia ka jingdawa ki samla pule, u Bah Hek ula ong, ba ka seng ka don ia ka jingsngewkhia halor ka bha ka miat jong ki samla pule.
“Ngam don ia ka jingsngewkhia shaphang kano kano ka seng sain pyrthei. Ki don ia la ka jingsngew ne jingpynpaw. Hynrei ngi baroh ngi don ia ka jingsngewkhia halor ki samla pule. Ki samla pule ki jong ngi kila shah ktah jur. Na ka bynta kano kano ka dawbah kaba iadei bad ka bha ka miat ki briew ki jong ngi, kadei ka kamram bad ka jingkitkhlieh ka jong ngi ban pynthikna ba kam dei ban don kano kano ka jingeh” ula ong.
Halor ka jingdawa ba u Myntri ka Sorkar Pdeng udei ban hiar shuki noh, u Bah Hek ula ong, ba ia kum katei ka jingdawa dei ban pynshong nongrim katkum ka jingshisha.
“Nyngkong kin hap ban peit ia ka mat kaba kongsan tam. Hadien ba lah dep ban pynshisha bha, kaei kaba ka sorkar ka shim ia ka rai, kan sa shim ia ki sienjam kiba thikna” ula ong.
Ha kaba iadei bad ka jingkynnoh ia ka jingpyndonkam da ka bor pyrshah ia ki samla pule kiba pynlong ia ka jingiakhih, u Bah Hek ula ong, ba ia kane ka kam dei ban ieh ha ka Sorkar Pdeng bad ka long kaba donkam ban khmih bniah ia ka jinglong jingman ha katei ka jaka.
“Lada phi kylli ia nga, ngan ieh beit ha ka jingstad jong ka Sorkar Pdeng ba kan shim ia ki sienjam kiba paka halor kaei kaei kaba lah dep jia. Ki bor kiba dei khmih ia ka shongsuk shongsain ki donkam ban leit khmih hi dalade ban pynshisha ia kaei kaba jia ha katei ka jaka. Ngim tip shisha ia kaei kaba la jia hangtei” ula ong.
U Bah Hek ula banjur ba ka jingpynrem khlem da ka pynshisha kan long kaba dang kloi palat.
“Kum ka Sorkar kaba don ia ka jingkitkhlieh, dei ban don ia ka jingtohkit. Khlem ka jingtohkit, ngi donkam nyngkong ban lap ia ka jingshisha. Ngim lah ban ai kano kano ka jingkren khlem da pynshisha shwa. Shwa ba ngin kren pyrshah iano iano, ngi hap ban ioh shwa ia ki jingshisha. Khlem ki jingshisha ngim lah ban shu kren ha lyer” ula ong.
Ula kyntu ia ki paitbah ba kin peit ruh ia ki bynta kiba bha ha ka rukom ai ia ka synshar khaddar.
“Ki paitbah ki peit tang ia kaba bakla. Ng idei ruh ban peit ia ki bynta kiba bha ruh. Haba ngi pyntreikam ia kino kino ki kam pynroi ne polisi, kadei ban ai jingmyntoi ia ki paitbah” la bynrap u Bah Hek.
