Shillong, Naitung 21: Ka jingpan tiket ki kyrtong ban iakhun ia ka elekshon shiteng samoi jong ka MP Lok Sabha na Shillong Parliamentary hapoh ka seng BJP kala sdang ban khluit, ha kaba palat ia ka 9 ngut kila dep ban phah da ka aplikeshon ia ka jingthrang ka jongki ban iakhun ia katei ka elekshon na ka seng BJP.
U MLA ka Pynthorumkhrah bad Nongialam ka seng BJP u Bah AL Hek ula ong, ha ka sngi Baar ba ia kitei ki aplikeshon lah dep ban phah sha ki nongialam jong ka seng ha Delhi da u President ka BJP Meghalaya Unit.
U Bah Hek, ula pynpaw ba ka jingshim ia ka rai ka lah ban dang shim por, namar ba ki nongialam kiba ha khlieh jong ka BJP ki dang bunkam ha kaban pynkhlain ia ka seng.
“Ki nongkitkam ka BJP bad ki dkhot jong ka Executive Committee hapoh ka ri kadei kaba ym pat lah ban pyndep. Ki don bun ki mat kiba sngewkhia, kumta kin sa shim ia ka rai ha ka por kaba biang na ka bynta ka elekshon ha Shillong” ula ong haba iakren bad ki nongthoh khubor.
Ka seng mynta ka dang ap ia ka jingbthah na ki nongialam na Delhi ha kaba iadei bad ki kyrtong na ka bynta ka elekshon shiteng samoi kaban sa wan.
