Shillong, Naitung 21: U Working President ka NPP Meghalaya bad Myntri Sorkar Marcuise N Marak u la ong ba ka party ka khmih lynti ba u MP sha Rajya Sabha James PK Sangma un mihkhmat bad trei borbah ha ka ban iakren halor ki mat ba dang sahteng jong ka Meghalaya ha Parliament.
U James PK Sangma, ula bam smai kum u MP sha Rajya Sabha ha ka sngi Nyngkong.
“Ngi khmih lynti ia kaba bha na u namar ba u don ka jingtip kaba kham bha ia ka Jylla jong ngi bad u lah ban mihkhmat bha Parliament ban iasaid” la ong u Marcuise.
U la bynrap ba ka jingnang bha jong u James haka ktien ka thylliej kan iarap bha ia u ban iasaid ha Parliament.
“Um don kano kano ka jingeh ha ka ktien ka thylliej. U lah ban kren Hindi bad phareng. Kata kan iarap ia u ban pynpaw ia ki jingeh jong ngi hapoh parliament” ula ong.
U Myntri u la jer kyrteng ia ki katto katne ki mat ba kongsan kiba donkam ban shimkhia kyrkieh da u MP ba thymmai ha Parliament.
“Ngi don shibun ki mat ha ka Jylla kiba donkam ban pynpaw ha Parliament. Kiba dang sahteng ki kynthup ia ka jingpyntreikam ia ka Inner Line Permit, ka jingpynrung ia ka ktien Khasi bad Garo haka khyrnit ba phra, bad katto katne kiwei pat” u la ong.
